اسلام آباد(پاکستان پوائنٹ نیوز31۔اگست۔2018ء) وفاقی وزیر اطلاعات و نشریات فواد چودھری نے آکھیا اے کہ ڈھائی کروڑ رُپئے دا بل نواز شریف نوں گھلن دا فیصلا کیتااے، نواز شریف دے بالاں نے اک کروڑ 70لکھ دے خرچے کیتے نیں، ایہ سفری خرچے واپس لئے جان گے۔ وفاقی وزیر اطلاعات و نشریات فواد چودھری و اعظم سواتی اج پی آئی ڈی وچ پریس کانفرنس کر رہے سن۔ فواد چودھری نے آکھیا کہ نواز شریف دے بالاں نے اک کروڑ 70لکھ دے خرچے کیتے نیں۔
ڈھائی کروڑ رُپئے دا بل نواز شریف نوں گھلن دا فیصلا کیتا اے۔مریم، حسن تے حسین نواز وی سرکاری خرچے اُتے سفر کردے رہے۔ ایہ سفری خرچے واپس لئے جان گے۔ اوہناں نے آکھیا کہ وزیر اعظم عمران خان دے 2وار ہیلی کاپٹر راہیں بنی گالا جان اُتے رولا پایا گیا۔ پر نواز شریف دے خاندان نے ارباں رُپئے خرچ کیتے۔ فواد چودھری نے آکھیا کہ اسیں الیکشن دی شفافیت اُتے یقین رکھدے آں۔
تحریک انصاف تے عمران خان نے الیکشن وچ دھاندلی اُتے لڑائی لڑی اے۔ اسیں ثابت کراں گے کہ الیکشن صاف شفاف ہوئے نیں تاں جے الیکشن اُتے کوئی انگلی نہ چُکی جا سکے۔ اوہناں دا کہنا سی کہ کرکٹ دی دنیا وچ نیوٹرل ایمپائر دا تصور عمران خان نے دتا اے۔ اعظم سواتی نے آکھیا کہ الیکشن کمیشن یاں اوہدے عملے نوں بچان لئی نہیں آئے۔ نہ ای اسیں نادرا نوں ٹارگٹ کرن آئے آں۔
آر ٹی ایس بارے واضح کر دیواں گا کہ ایہ کیویں کم کردا اے۔ اوہناں نے آکھیا کہ فرانزک ماہرین آر ٹی ایس سسٹم دا معائنہ کرن۔ ہر پریزائیڈنگ افسر کول وٹس ایپ کیتی گئی تصویر دا ویلا موجود اے۔ آر ٹی ایس نوں روکیا گیا اے جیہدیاں تحقیقات کرائیاں جان۔ایس توں وکھ اعظم سواتی نے آکھیا کہ 12وجے دے نیڑے جدوں الیکشن کمیشن نوں پتا نہیں سی نتیجے آ رہے نیں تے شہباز شریف نوں کیویں پتا لگا؟چار الیکشن کمشنر دی تعیناتی پیپلز پارٹی تے مسلم لیگ (ن) نے کیتی۔ الیکشن کمیشن نے ساڈے نال ہمیشہ سوتیلی ماں ورگا سلوک کیتا اے۔
