لاہور(پاکستان پوائنٹ نیوز31۔اگست۔2018ء) وزیر صحت پنجاب ڈاکٹر یاسمین راشد نے آکھیا اے کہ ہسپتالاں وچ نرساں دی کمی دور کرن لئی 2200اسامیاں اُتے بھرتی دی منظوری دے دتی گئی اے۔ ایہ بھرتیاں پبلک سروس کمیشن راہیں کیتیاں جان گیاں۔ نرسنگ سٹاف ایسوسی ایشن دے وفد نال ملاقات دوران اوہناں نے آکھیا کہ نرسنگ سٹاف محکمہ صحت دا اک اہم حصہ اے۔ نرسیاں دے مسئلے حل کرن وچ کوئی کسر نہیں چھڈاں گے پر ایہ نرساں دا وی فرض اے کہ اوہ روگیاں دی خدمت دے جذبے نال پیشے دی عزت ودھان۔
وزیر صحت نے آکھیاکہ تحریک انصاف دی حکومت دا اک ای ایجنڈا اے تے اوہ اے عام بندے دی بہتری۔ ایس ایجنڈے دی تکمیل لئی وزیر اعظم عمران خان تے وزیر اعلا پنجاب سردار عثمان بزدار دی ٹیم دن رات اک کر رہی اے۔اوہناں دا کہنا سی کہ صحت دے شعبے اُتے لوکائی دا اعتماد ودھان وچ نرسنگ سٹاف دا اہم کردار اے۔ بطور ڈاکٹر نرساں نال لمی چر تیکر کم کیتا تے پی ایم اے دے پلیٹ فارم توں اوہناں دے حقاں لئی ہمیشہ آواز چُکی۔ ڈاکٹر یاسمین راشد نے آکھیا کہ ہسپتال آن والے دُکھی روگیاں نال چنگا سلوک ای آخرت وچ نجات دا ذریعہ اے۔ روگیاں نال چنگا سلوک سرکاری ہسپتالاں دا وطیرہ ہونا چاہیدا۔ ہسپتال خاص کر ایمرجنسی وچ آن والیاں نال مندا سلوک برداشت نہیں کیتا جائے گا۔
