کراچی(پاکستان پوائنٹ نیوز31۔اگست۔2018ء) خام تیل دی قیمت اک مہینے وچ اُچی پدھر اُتے اپڑ گئی، قیمت 70ڈالر فی بیرل دی حد پار کر گئی۔ عالمی منڈی وچ خام تیل دیاں قیمتاں وچ اک وار فیر وادھا شروع ہو گیا۔ خام تیل دی قیمت اک مہینے وچ 70ڈالر فی بیرل دی حد پار کر گئی۔ آنکڑیاں(اعداد وشمار) مطابق ایس ویلے خام تیل دی قیمت وچ 1فیصد ہور وادھا ہو گیا اے۔ خام تیل دی قیمت وچ وادھے دی وجہ توں امریکا ولوں ایران اُتے نویاں پابندیاں لائے جان دا خدشہ اے۔
عالمی منڈی وچ سپلائی وچ کٹوتی دے خدشے مگروں خام تیل دیاں قیمتاں ودھ رہیاں نیں۔ معاشی تجزیہ کاراں مطابق جے عالمی منڈی وچ خام تیل دیاں قیمتاں وچ وادھے دا رجحان جاری رہیاتے کل نوں پاکستان وچ پٹرولیم وستاں دیاں قیمتاں وچ وادھا شروع ہو جائے گا، جیہدے نال مہنگائی ودھے گی۔
