نواز شریف تے مریم نواز وی وزیراعظم عمران خان دی کارکردگی اُتے خش

نواز شریف تے مریم نواز دا پی ٹی آئی دے پہلے 10دناں دی کارکردگی اُتے اطمینان دا اظہار:مشہور پرچا کار اعزاز سید دا ٹویٹ

نواز شریف تے مریم نواز وی وزیراعظم عمران خان دی کارکردگی اُتے خش
نواز شریف تے مریم نواز دا پی ٹی آئی دے پہلے 10دناں دی کارکردگی اُتے اطمینان دا اظہار:مشہور پرچا کار اعزاز سید دا ٹویٹ

لاہور(پاکستان پوائنٹ نیوز31۔اگست۔2018ء) اڈیالا جیل وچ قید سابق وزیر اعظم نواز شریف تے اوہناں دی دھی مریم نواز نے پی ٹی آئی حکومت دے پہلے دس دناں دی کارکردگی اُتے اطمینان دا اظہار کیتا اے۔ تفصیل مطابق پاکستان تحریک انصاف نوں حکومت دی نس بھج سنبھالے دس دن توں اُتے ہو گئے نیں۔ ایس دوران نویں حکومت نے کئی اہم فیصلے وی کیتے۔ وفاقی کابینہ دا پہلا اجلاس سدیا گیا جیہدے وچ اہم فیصلے ہوئے۔

کابینہ اجلاس دوران اسمبلی ارکان دی غیر ملکی علاج دی سہولت ختم کیتی گئی۔ سرکاری گھراں بارے کمیٹی بنائی گئی۔ وزیر اعظم ہاؤس دیاں گڈیاں نیلام کرن دی منظوری دتی گئی۔ وزیر اعظم دے ملازماں دی اہلیت مطابق تبادلیاں دا فیصلا کیتا گیا۔ ایس توں وکھ ایہ وی فیصلا کیتا گیا کہ ایس وار اقوام متحدہ دے اجلاس وچ وزیر خارجا جان گے، وزیر اعظم نہیں۔ادارہ جاتی اصلاحات کمیٹی دی منظوری دے دتی گئی۔

ریلوے، ایجوکیشن تے صحت اُتے اگلے اجلاس وچ رپورٹ پیش کرن دا حکم دتا گیا۔ نویں حکومت دے دوجے دن سرکاری ٹی وی توں سیاسی سینسر شپ دا خاتمہ کیتا گیا۔ پنجاب دے پنج وزیر اعلا ہاؤسز دی انکوائری دا فیصلا کیتا گیا۔ وزیر اعلا پنجاب نے پروٹوکول ختم کرن دا اعلان کیتا۔ ایس توں وکھ وی کئی فیصلے کیتے گئے۔ جدکہ تحریک انصاف دی حکومت نوں کُجھ معاملات وچ تنقید دا وی ساہمنا اے۔

جیہدے وچ شیخ رشید دا ریلوے افسر نال جھیڑا، وزیر اعظم ولوں ہیلی کاپٹر دی ورتوں، وزیر اعلا پنجاب دا پروٹوکول، ڈی پی او پاکپتن دا معاملا ایس توں وکھ صوبائی وزیر فیاض الحسن چوہان دی غیر اخلاقی گل بات شامل اے۔ پر اڈیالا جیل وچ قید نواز شریف تے مریم نواز عمران خان دی کارکردگی توں خش نظر آؤندے نیں۔ ایس بارے مشہور پرچا کار اعزاز سید نے ٹویٹ کردے ہوئے آکھیا کہ اڈیالا جیل وچ نواز شریف تے مریم نواز نے پی ٹی آئی دی حکومت دے پہلے دس دناں دی کارکردگی اُتے اطمینان دا اظہار کیتا اے۔ اپوزیشن دے 100دناں دے نشانے اک مہینے توں وی گھٹ ویلے وچ پورے ہون دی آس اے۔