اسلام آباد(پاکستان پوائنٹ نیوز30۔اگست۔2018ء) وزیر اعظم عمران خان نے اج جی ایچ کیو راولپنڈی دا دورہ کیتا، عمران خان نے اپنے دورے دوران چیف آف آرمی سٹاف جنرل قمر جاوید باجوہ نال ملاقات وی کیتی، ملاقات دوران ملک وچ امن و امان دی صورتحال بارے وچار وٹاندرا کیتا گیا۔ میڈیا رپورٹس مطابق وزیر اعظم عمران خان اج وفاقی کابینہ دے کُجھ خاص ارکان نال سویرے 10وجے جی ایچ کیو اپڑے۔
وزیر اعظم عمران خان نے جی ایچ کیو وچ آرمی چیف جنرل قمر جاوید باجوہ نال ملاقات کیتی۔وزیر اعظم عمران خان نوں جی ایچ کیو وچ 8گھنٹے بریفنگ دتی گئی۔ وزیر اعظم عمران خان نوں قومی سلامتی تے خطے دی سکیورٹی صورتحال بارے بریفنگ دتی گئی۔وزیر اعظم نوں دہشت گردی تے انتہا پسندی خلاف جاری آپریشنز بارے وی دسیا گیا۔ ایس موقعے تے وزیر اعظم عمران خان نال خارجا، خزانہ تے اطلاعات و نشریات دے وزیر موجود سن۔
وزیر اعظم دے دورہ جی ایچ کیو راولپنڈی بارے وفاقی وزیر اطلاعات ونشریات فواد چودھری دا کہنا سی کہ جی ایچ کیو دا دورہ بہت چنگارہیا۔ جی ایچ کیو وچ دتی گئی بریفنگ بڑی اہمیت رکھدی سی۔ اوہناں نے آکھیا کہ وزیر اعظم تے کابینہ ارکان نوں دنیا دی بہترین فوج دی کمانڈ نال ملاقات اُتے فخر اے۔ سارے اداریاں وچکار رابطیاں تے تعاون نال پیش چیلنجز اُتے قابو پا سکدے آں۔
