اسلام آباد(پاکستان پوائنٹ نیوز30۔اگست۔2018ء) سابق وزیر قانون پنجاب رانا ثنااللہ نے آکھیا اے کہ پیپلز پارٹی نے صدارتی الیکشن وچ حکومتی امیدوار نوں سہولت دین لئی اپنا امیدوار کھڑا کیتا اے، جیہڑے شہیداں نے ملک وچ امن لئی اپنیاں جاناں دتیاں اوہناں نوں ساری قوم سلام پیش کر دی اے۔ جمعرات نوں پارلیمنٹ ہاؤس دے باہر میڈیا نال گل بات کردے ہوئے اوہناں نے آکھیا کہ متحدہ اپوزیشن ولوں صدارتی امیدوار مولانا فضل الرحمان نیں، دوجا کوئی نہیں اے ۔
اوہناں دا کہنا سی کہ پیپلز پارٹی نے حکومتی امیدوار نوں سہولت دین لئی اپنا امیدوار کھڑا کیتا اے۔ ایم ایم اے تے مسلم لیگ (ن) دے سارے ممبر اپوزیشن دا کردار نبھان گے۔ اوہناں نے آکھیاکہ پیپلز پارٹی دا اصل مسئلا سندھ حکومت اے، وفاقی حکومت سندھ وچ پیپلز پارٹی نوں تے پیپلز پارٹی اوہنوں وفاق وچ سہولت دے رہی اے۔ اوہناں نے آکھیا کہ پہلے اسیں ایہ آس کررہے ساں کہ پی ٹی آئی ڈھائی سال حکومت کرے گی تے اسیں مڈٹرم الیکشن ول جاواں گے، پر ہن انج لگ رہیا اے کہ ایہ حکومت چھ مہینے نہیں چل سکے گی۔
رانا ثنااللہ نے آکھیا کہ جیہڑے شہیداں نے ملک وچ امن لئی اپنیاں جاناں دتیاں اوہناں نوں ساری قوم سلام پیش کر دی۔شہیداں دیاں قربانیاں دی وجہ توں ملک وچ امن قائم ہویا اے۔ قوم ’یوم شہداء‘ دے موقعے تے ایہناں ستاریاں نوں سلام پیش کردی اے۔
