خواجا سعد رفیق دا اک وار فیر میدان وچ آن دا فیصلا

لاہور(پاکستان پوائنٹ نیوز30۔اگست۔2018ء) خواجا سعد رفیق نے حلقہ این اے 131توں ضمنی الیکشن وچ حصہ لین لئی کاغذات نامزدگی جمع کروا دتے۔عام انتخابات 2018وچ لاہور دے قومی اسمبلی دے حلقہ این اے 131توں چیئرمین تحریک انصاف عمران خان نے خواجا سعد رفیق نوں ہرایا سی، سعد رفیق نے حلقے وچ دھاندلی دا الزام لاؤندے ہوئے دوبارہ گنتی دی درخاست وی کیتی سی، جیہنوں رد کر دتا گیا سی۔

پر ہن اک وار فیر مسلم لیگ (ن) نے این اے 131توں ضمنی الیکشن وچ حصہ لین لئی خواجا سعد رفیق نوں ٹکٹ جاری کیتا اے، جیہدے مگروں اوہناں نے اج اپنے کاغذات نامزدگی جمع کروا دتے۔ خواجا سعد رفیق دے ترجمان قاسم نے اوہناں دے کاغذات جمع کروائے تے ریٹرننگ افسر رحم زادہ نے اوہناں دے کاغذات وصول کیتے۔ سابق وزیر ریلوے دے کاغذات وچ کورنگ امیدوار دے طور اوہناں دی بیوی غزالہ سعد رفیق نیں۔