اسلام آباد(پاکستان پوائنٹ نیوز29۔اگست۔2018ء) پچھلے دو دناں توں وزیر اعظم عمران خان دے ہیلی کاپٹر اُتے سفر کرن دا معاملہ ہر پاسے بحث دا موضوع بنیا ہویا اے۔ ایس معاملے اُتے وفاقی وزیر اطلاعات فواد چودھری نے اپنے بیان وچ آکھیا اے کہ عمران خان جس ہیلی کاپٹر وچ سفر کردے نیں‘ اوس ہیلی کاپٹر دا خرچہ 50 توں 55 رُپیے فی کلومیٹر بن دا اے۔ جیہدے اُتے سیاسی حلقیاں وچ کھپ پے گئی۔
تے ہُن جمعیت علمائے اسلام دے رہنما مولانا عبدالغفور حیدری نے وی ہیلی کاپٹر دی منگ کر دِتی اے۔ اوہناں آکھیا کہ جے کر ہیلی کاپٹر دا سفر سستا اے تاں فیر صرف عمران خان ای کیوں؟ ساریاں نُوں ہیلی کاپٹر وچ ای ایوان وچ لیایا جاوے۔ اوہناں کہیا کہ وزیر اطلاعات دسدے نیں کہ عمران خان ایس لئی ہیلی کاپٹر وچ سفر کردے نیں کہ ایہدا خرچہ گھٹ اے۔ جے کر انج اے تاں اسیں سارے پارلیمنٹ ممبراں نُوں پارلیمنٹ لاجز توں ایوان وچ اپڑایا جائے ۔
سیکیورٹی دا مسئلہ تاں ساریاں نُوں بنیا پیا اے۔ میرے اُتے وی اِک بہت وڈا حملہ ہو چکیا اے۔ میڈیا نال گل بات کردیاں جمعیت علمائے اسلام دے رہنما مولانا عبدالغفور حیدری نے کہیا کہ عمران خان اُتے ہُن تیک کوئی اجیہا حملہ نہیں ہویا تاں فیر اوہ سیکیورٹی تے پروٹوکول کیوں لے رہے نیں؟ جے کر ہیلی کاپٹر دا سفر اینا ای سستا اے تاں صرف خان صاحب کیوں‘ گھٹو گھٹ پارلیمنٹ ممبراں نُوں وی ایس توں فائدہ چُکنا چاہیدا اے۔
چیتے رہوے کہ عمران خان دے وزیر اعظم آفس توں بنی گالہ ہیلی کاپٹر اُتے جاون دے معاملے اُتے وفاقی وزیر اطلاعات فواد چودھری نے کہیا سی کہ ہیلی کاپٹر دا خرچ 50 توں 55 رُپئے فی کلومیٹر اے۔ پر ایوی ایشن ماہر مُوجب وزیر اعظم عمران خان دی ورتوں ہیٹھ آؤن والا ہیلی کاپٹر پاکستان سرکار دی ملکیت اے۔ گوگل نقشے مُوجب بنی گالہ توں پاک سیکرٹریٹ دا پندھ 15 کلومیٹر بن دا اے‘ ہوا بازی دی زبان وچ ایہہ فاصلہ 8 ناٹیکل مِیل بن دا اے۔ آگسٹا ویسٹ لینڈ کمپنی دا ہیلی کاپٹر اے ڈبلیو 139 وزیر اعظم دی ورتوں وچ اے۔ وزیر اعظم دی ورتوں وچ آؤن والے ایس ہیلی کاپٹر دا فی مِیل خرچ 13ڈالر یعنی 1600 رُپئے بن دا اے‘ پاکستانی رُپیاں وچ کُل خرچہ دس ہزار توں 12 ہزار رُپیے تیک بن دا اے۔
