اسلام آباد(پاکستان پوائنٹ نیوز29۔اگست۔2018ء) وزیر اعظم عمران خان نے وفاقی کابینہ وچ وادھا کرن دا فیصلہ کر لیا اے۔ میڈیا رپورٹ مطابق وفاقی کابینہ وچ ہور ممبر شامل کرن اُتے عمل صدارتی چوناں مگروں ہووے گا۔ میڈیا وسیلیاں نے دسیا اے کہ پہلے مرحلے وچ وفاقی وزیراں دے حلف اُٹھاون مگروں ہُن دُوجے مرحلے وچ ہور 8 توں 10 وفاقی وزیر حلف چُکن گے۔ وفاقی کابینہ وچ پاکستان تحریک انصاف نُوں سینیٹ توں وی نمائندگی لبھے گی۔
وسیلیاں نے ہور دسیا کہ وفاقی کابینہ وچ وادھے نُوں مُکھ رکھدیاں اعظم سواتی نُوں وفاقی وزیر سائنس تے ٹیکنالوجی بنائے جان دا امکان اے جد کہ پارٹی رہنما علی امین گنڈا پور تے علی زیدی نُوں وی وفاقی کابینہ وچ شامل کیتا جاوے گا۔ چیتے رہوے کہ پہلے مرحلے وچ 20 اگست نُوں پیر دی سویر وزیر اعظم عمران خان دی سولہ رُکنی وفاقی کابینہ نے حلف چُکیا سی۔
وفاقی کابینہ وچ 16 وزیر تے 5 مشیر شامل سن۔ حلف اُٹھاون والے وفاقی وزیراں وچ مخدوم شاہ محمود قریشی (وزیر خارجہ امور)، پرویز خٹک (وزیر دفاع)، اسد عمر (وزیر خزانہ، ریونیو تے اقتصادی امور)، ڈاکٹر فہمیدہ مرزا (وزیر بین الصوبائی رابطہ)، شیخ رشید احمد (وزیر ریلوے)، خالد مقبول صدیقی (وزیر انفارمیشن ٹیکنالوجی و مواصلات)، شفقت محمود (وزیر وفاقی تعلیم و پیشہ وارانہ تربیت، قومی تاریخ و ادبی ورثہ)، فواد احمد ((وزیر اطلاعات و نشریات)، زبیدہ جلال (وزیر دفاعی پیداوار)، غلام سرور خان (وزیر پٹرولیم تے قدرتی وسائل)، ڈاکٹر شیریں مزاری (وزیر انسانی حقوق)، نور الحق قادری (وزیر مذہبی امور و بین المذاہب ہم آہنگی)، چوہدری طارق بشیر چیمہ (وزیر ریاستاں تے سرحدی علاقہ جات)، سینیٹر ڈاکٹر محمد فروغ نسیم (وزیر قانون و انصاف)، عامر محمود کیانی (وزیر قومی صحت، خدمات، ریگولیشن و کوآرڈینیشن) تے خسرو بختیار شامل نیں جد کہ محمد شہزاد ارباب نُوں اسٹیبلشمنٹ، عبدالرزاق داؤد کامرس، ٹیکسٹائل، صنعت و پیداوار تے سرمایہ کاری، ڈاکٹر عشرت حسین ادارہ جاتی اصلاحات تے کفایت شعاری، امین اسلم ماحولیاتی تبدیلی اور ظہیر الدین بابر اعوان کو پارلیمانی اموردے مشیر دے طور تے مقرر کیتا گیا اے۔
تے ہُن وفاقی کابینہ وچ ہور وزیر شامل کرن دا فیصلہ کیتا گیا اے ایس مرحلے وچ 8 توں 10 وزیراں ولوں حلف چُکے جاون دا امکان اے۔ دُوجے مرحلے دے وفاقی وزیر صدارتی چوناں مگروں ای حلف چُکن گے۔
