اسلام آباد(پاکستان پوائنٹ نیوز29۔اگست۔2018ء) پی ٹی آئی دی مرکزی قیادت نے ناراض آگو عامر لیاقت حُسین نال رابطہ کیتا اے۔ میڈیا رپورٹس مطابق تحریک انصاف نے عامر لیاقت حُسین نُوں مناون دیاں کوششاں شروع کر دِتیاں نیں۔ پی ٹی آئی دی قیادت تے عامر لیاقت وچکار ٹیلی فون اُتے ہون والے رابطے وچ عامر لیاقت نے واہوا گِلے شکوے کیتے۔ پارٹی دی مرکزی قیادت نے آکھیا اے کہ عامر لیاقت گلے شکوے تے دُوجے معاملے متعلقہ فورم اُتے لیان۔
اوہناں دے تحفظات سُنے جاون تے اوہناں اُتے غور وی کیتا جاوے گا۔ چیتے رہوے تحریک انصاف نُوں وفاق وچ حکومت سانبھیاں حالے کُجھ دیہاڑ ای ہوئے نیں تے اوہنوں کئی گھمبیر اندرونی مسئلیاں دا ساہمنا کرنا پے گیا اے۔ پسند دیاں وزارتاں نہ ملن اُتے کئی اتحادی تے کئی تحریک انصاف دے آگو رُسے پئے نیں۔ ایہناں آگووواں وچ کراچی توں تحریک انصاف دے ٹکٹ اُتے چُنے جان والے رُکن قومی اسمبلی عامر لیاقت حُسین وی شامل نیں۔
ماضی وچ متحدہ قومی موومنٹ نال جُڑے رہن والے عامر لیاقت حُسین چوناں توں کجھ چِر پہلاں ای تحریک انصاف وچ شامل ہوئے سن۔ عامر لیاقت حُسین نُوں شامل کرن دے معاملے اُتے عمران خان نُوں چوکھی مخالفت دا ساہمنا وی کرنا پیا سی‘ فیر وی اوہناں عامر لیاقت حُسین نوں صرف پارٹی وچ شامل کیتا سگوں بعد وچ اوہناں نُوں قومی اسمبلی دی سِیٹ لئی ٹکٹ وی دے دِتا۔
پر ایہناں ساریاں نوازشاں مگروں وی عامر لیاقت حُسین تحریک انصاف دی لیڈر شپ توں رُس گئے نیں۔ عامر لیاقت حُسین نُوں اُمید سی کہ اوہناں نُوں وفاقی کابینہ دا حصّہ بناندے ہوئے وزارت توں نوازیا جاوے گا‘ پر انج نہ ہو سکیا تے عامر لیاقت نے تحریک انصاف خلاف بغاوت کر دِتی۔ عامر لیاقت حُسین دا دعویٰ اے کہ کراچی وچ تحریک انصاف نُوں ووٹ مِلن دا سبھ توں ودھ کریڈٹ اوہناں نُوں جاندا اے۔ دُوجے پاسے وسیلیاں دا آکھنا اے کہ متنازعہ شخصیت ہون کارن عامر لیاقت حُسین نُوں کسے وی قسم دی وزارت دِتے جان دی کوئی آس نہیں اے۔
