اسلام آباد(پاکستان پوائنٹ نیوز29۔اگست۔2018ء) مشہور پرچاکار چودھری غلام حُسین دا آکھنا اے کہ پاکستان مسلم لیگ نواز گروپ دے مصدقہ حلقیاں توں مینوں ایہہ خبر مِلی اے کہ نواز شریف دی ضمانت ہو جاوے گی۔ اوہناں دا ہور ایہہ آکھنا سی کہ نواز شریف دی اکتو بر 2018 وچ ضمانت ہو جاوے گی تے سابق وزیر اعظم نواز شریف دی ایہہ ضمانت اسلام آباد ہائی کورٹ توں ہووے گی۔
جیہدے مگروں وزیر اعظم عمران خان تے پنجاب حکومت ایہہ فیصلہ کرے گی کہ نواز شریف اُتے کرپشن دے دُوجے کیساں دا کیہ کرنا اے۔ اوہناں دا آکھنا سی مینوں وی ایہہ خبر سچی لگدی اے کہ نواز شریف دی ضمانت ہو جاوے گی۔ پر جیہڑے اوہناں اُتے دُوجے ریفرنسز نیں‘ اوہ اک وکھرا کیس اے۔ فی الحال ایون فیلڈ ریفرنس وچ نواز شریف نُوں اکتوبر دے پہلے یاں دُوجے ہفتے ضمانت لبھ جاوے گی۔
جیہدے مگروں سیاسی طور تے اِک واری فیر تھرتھلی مچّے گی۔ جد کہ دُوجے پاسے سابق وزیر اعظم محمد نواز شریف تے اوہناں دی دِھی مریم نواز دیاں رہائش گاہواں نُوں سب جیل قرار دیون لئی سپریم کورٹ وچ اپیل دائر کیتی گئی اے۔ وطن پارٹی دے آگو بیرسٹر ظفر اللہ خان نے ایہہ اپیل دائر کیتی۔ اپیل وچ کہیا گیا کہ نواز شریف بیمار نیں تے قید دے دووران طبیعت خراب ہون اُتے اوہناں نُوں ہسپتال وی گھلنا پیا۔
درخواست گزار نے آکھیا کہ دوویں پیو دِھی رضاکارانہ طور تے عدالتی کارروائی نُوں اگے ودھاؤن لئی لندن توں واپس آئے‘ اوہناں قانون نُوں عزت دِتی۔ درخواست گزار نے سابق صدر پرویز مشرف دی مثال دیندیاں آکھیا کہ پرویز مشرف آئین پاکستان دے آرٹیکل 6 تحت قصور وار آکھے گئے تاں اوہناں دے گھر نُوں ای سب جیل دا درجہ دِتا گیا سی۔ درخواست گزار نے کہیا کہ مگروں سپریم کورٹ توں ضمانت اُتے اوہ باہرلے دیس ٹُر گئے تے فیر مُلک واپس نہیں پرتے ہن۔
