سپریم کورٹ:نواز شریف دے گھر نوں سب جیل قرار دین لئی اپیل دائر

سپریم کورٹ:نواز شریف دے گھر نوں سب جیل قرار دین لئی اپیل دائر

اسلام آباد(پاکستان پوائنٹ نیوز28۔اگست۔2018ء) سابق وزیر اعظم میاں نواز شریف تے اوہناں دی دھی مریم نواز دے گھراں نوں سب جیل قررا دین لئی سپریم کورٹ وچ اپیل دائر کر دتی گئی اے۔ وطن پارٹی دے سربراہ بیرسٹر ظفر اللہ خان نے اج اپیل دائر کیتی۔ اپیل وچ آکھیا گیا اے کہ نواز شریف بیمار نیں تے قید دوران طبیعت وگڑن اُتے اوہناں نوں ہسپتال وی منتقل ہونا پیا۔

درخاست گزار نے آکھیاکہ دوویں فریق رضا کارانہ طور اُتے عدالتی کارروائی نوں اگانہ ودھان لئی لندن توں واپس آئے، اوہناں نے قانون نوں عزت دتی۔ درخاست گزار نے سابق صدر پرویز مشرف دی مثال دیندے ہوئے آکھیا کہ پرویز مشرف آئین پاکستان دے آرٹیکل 6دے تحت قصور وار قرار دتے گئے سن تے اوہناں دے گھر نوں وی سب جیل دا درجہ دتا گیا سی۔ درخاست گزار نے آکھیا کہ بعدوں سپریم کورٹ توں ضمانت اُتے اوہ باہرلے ملک روانہ ہوئے تے ملک واپس نہیں آئے نیں۔

درخاست گزار نے اپیل وچ آکھیا کہ امریکا وچ تعینات پاکستان سفارت کار حسین حقانی نوں وی آئین دے آرٹیکل 6دے تحت قصور وار قرار دتا گیا پر اوہ کیس دی کارروائی دوران پریذیڈنٹ ہاؤس وچ رہندے سن تے سپریم کورٹ توں ضمانت ملن تیکر اوہ وزیر اعظم ہاؤس وچ ای رہے۔ درخاست گزار نے عدالت نوں آکھیا کہ پاکستان تحریک انصاف دی حکومت نے کابینہ دے پہلے اجلاس وچ نواز شریف تے مریم نواز دا ناں جیل وچ ہون مگروں ایگزٹ کنٹرول لسٹ وچ پا دتا۔ درخاست وچ قیدیاں بارے قانون نمبر225,6,4تے 245داذکر وی کیتا گیا اے۔