اسلام آباد(پاکستان پوائنٹ نیوز28۔اگست۔2018ء) الیکشن کمیشن آف پاکستان نے وفاقی راجدھانی اسلام آباد دے حلقہ این اے 53وچ ضمنی الیکشن لئی شیڈول جاری کر دتا، 30اگست تیکر امیدوار کاغذات نامزدگی ریٹرننگ افسر دے دفتر توں لے سکن گے، حلقہ این اے 53وچ ضمنی الیکشن لئی پولنگ 14اکتوبر نوں ہوئے گی۔ الیکشن کمیشن آف پاکستان ولوں جاری شیڈول مطابق امیدوار ریٹرننگ افسر و ڈسٹرکٹ الیکشن کمیشن اسلام آباد توں کاغذات نامزدگی 30اگست تیکر لے سکدے نیں جدکہ 31اگست نوں امیدواراں دی لسٹ جاری ہوئے گی۔
4ستمبر نوں امیدواراں دے کاغذاں دی پُن چھان کیتی جائے گی تے 8ستمبر نوں اپیلاں اُتے فیصلا ہوئے گا۔الیکشن کمیشن مطابق 13ستمبر نوں اپیلیٹ ٹربیونلز فیصلا دین گے، 14ستمبر نوں امیدواراں دی لسٹ لائی جائے گی۔15ستمبر نوں امیدوار کاغذ واپس لے سکن گے تے اوسے دن امیدواراں دی حتمی لسٹ لائی جائے گی جدکہ 16ستمبر نوں الیکشن کمیشن ولوں امیدواراں نوں انتخابی نشان الاٹ کیتے جان گے تے 14اکتوبر نوں ضمنی الیکشن لئی پولنگ ہوئے گی۔
