راولپنڈی(پاکستان پوائنٹ نیوز28۔اگست۔2018ء) سابق صدر مملکت جنرل (ر) پرویز مشرف نے اک وار فیر عدالت وچ پیش ہون توں انکار کر دتا۔ اوہناں نے آکھیا کہ بیمار آں، ڈاکٹراں نے سفر کرن توں منع کیتا اے، ملک واپسی اُتے سکیورٹی خدشے وی نیں۔ میڈیا رپورٹس مطابق راولپنڈی دی اُچیچی عدالت وچ غداری کیس وچ سابق صدر مملکت پرویز مشرف نے پیش ہون توں انکار کر دتا اے۔
پرویز مشرف دے وکیل اختر شاہ نے عدالت وچ آکھیا کہ پرویز مشرف ڈاڈھی بیماری پاروں ملک واپس نہیں آسکدے۔ پرویز مشرف دا ماہر ڈاکٹراں دی نگرانی وچ دبئی وچ علاج جاری اے۔ پرویز مشرف دے ڈاکٹراں نے اوہناں نوں پاکستان لئی سفر کرن دی اجازت نہیں دتی۔ پرویز مشرف نوں سکیورٹی خدشیاں دا وی ساہمنا اے۔ جیہدے کارن پرویز مشرف ایس پیشی اُتے عدالت وچ پیش نہیں ہون گے۔ چیتے رہوے کہ اُچیچی عدالت وچ سابق صدر پرویز مشرف خلاف غداری کیس دی کل فیر سنوائی ہوئی گی۔ عدالت نے پرویز مشرف دی واپسی تے اوہناں نوں سکیورٹی دین بارے وزارت داخلا کولوں جواب منگ لیا اے۔ وزارت داخلا کل عدالت وچ اپنا جواب جمع کروا دیوے گی۔
