لاہور(پاکستان پوائنٹ نیوز28۔اگست۔2018ء) میڈیا رپورٹس مطابق خاور فرید مانیکا دی دھی تے پُتر نال پولیس دی بدتمیزی دی اندرونی کہانی ساہمنے آ گئی۔ خاور مانیکا دا پُتر ابراہیم تے دھی مبشرہ واقعے توں 2دن پہلاں لاہوروں پیدل ٹُرے سن۔ 5اگست نوں 8وجے رات سپیشل برانچ نے دسیا کہ بشری بی بی پیدل دربار اپڑن گیاں۔ پاکپتن روڈ اُتے پولیس اپڑی تے پتا لگا کہ بشری بی بی نہیں بلکہ اوہناں دی دھی تے پُتر نیں۔
بشری بی بی تے خاور مانیکا دے پُتر ابراہیم تے مبشرہ نے سکیورٹی لین توں انکار کر دتا۔ آر پی او ساہیوال نے ڈی پی او رضوان گوندل نوں سکیورٹی دین دی ہدایت کیتی سی۔ پاکپتن روڈ اُتے پولیس فیر اپڑی تے پٹرولنگ پولیس بدتمیزی کردی نظر آئی۔ جدکہ ایس بارے گل بات کردے ہوئے مشہور پرچا کار عامر متین دا کہنا سی کہ سارا واقعہ23دا نہیں بلکہ5اگست دا اے۔
5اگست نوں پاکپتن اندر سپیشل برانچ وچ ایہ اطلاع دتی گئی کہ اک سوانی جو اوکاڑہ دے بارڈر توں پاکپتن ول پیدل جا رہی اے اوہدے نال اک مرد تے ڈبل کیبن گڈی موجود اے، ہو سکدا اے کہ ایہ خاتون اول ہوئے۔ اوکاڑہ بارڈر توں پاکپتن 25کلو میٹر دور اے۔ خاتون اول دی وجہ توں کنفیوژن پیدا ہوئی تے ضلعی انتظامیہ نوں تھرتھلی پے گئی۔ اوہناں نے پہلے ویڈیو بنان دی کوشش کیتی ، تاں جے پتا چل سکے کہ ایہ سوانی بشری بی بی اے یاں کوئی ہور۔
پولیس والیاں نے گڈی دی حفاظت لئی اپنی گڈی پچھے لا دتی ، ایس دوران پتا لگا کہ خاور مانیکا دے پُتر موجود نیں۔ ایس موقعے تے خاور مانیکا نے پولیس نال بدتمیزی کیتی کہ تُسیں ساڈی مانیٹرنگ کر رہے او۔ ایس طرحاں معاملا خراب ہو گیا۔ سویرے دو توں تن وجے تیکر انتظامیہ ایس معاملے نوں ویکھدی رہی۔ اگلے دیہاڑے ڈی پی او رضوان گوندل نوں آکھیا گیا کہ تُسیں رات دے واقعے اُتے خاور مانیکا دے ڈیرے اُتے جا کے معافی منگو تے اوہناں نے آکھیا کہ میں تے اوتھے نہیں سی میں معافی کیوں منگاں۔ایس طرحاں رضوان گوندل نوں عہدے توں ہٹا دتا گیا۔
