پشاور(پاکستان پوائنٹ نیوز27۔اگست۔2018ء) اقتدار سنبھالن مگروں تحریک انصاف وچ پہلی وڈی بغاوت ساہمنے آ گئی، رکن خیبرپختونخوا اسمبلی شاہ محمد وزیر نے پارٹی فیصلے توں بغاوت کردے ہوئے وزیر اعلا دے معاون خصوصی برائے ٹرانسپورٹ دا عہدہ لین توں انکار کر دتا۔ تفصیل مطابق تحریک انصاف نوں وڈی بغاوت دا ساہمنا کرنا پیا اے۔ تحریک انصاف نے 25جولائی دے الیکشن وچ جتھے وفاق تے پنجاب وچ فتح حاصل کیتی اوتھے خیبرپختونخوا وچ وی دوجی وار جت حاصل کیتی۔
پر اینی شاندار جت مگروں تحریک انصاف صوبے دی کابینہ بنان وچ جھیڑیاں دا شکار اے۔ وزارتاں دی ونڈ دے معاملے وچ تحریک انصاف دے رکن خیبرپختونخوا اسمبلی شاہ محمد وزیر نے پارٹی فیصلے توں بغاوت کردے ہوئے وزیر اعلا دے معاون خصوصی برائے ٹرانسپورٹ دا عہدہ لین توں انکار کر دتا اے۔ شاہ محمد وزیر دا کہنا اے کہ میں خیبرپختونخوا وچ سبھ توں سینئر آں، ایس لئی کوئی نِکا عہدہ نہیں لواں گا۔
اوہناں نے آکھیا اے کہ تحریک انصاف ولوں سوات دے ایم پی اے نوں وزارت اعلا دا عہدہ دتا گیا، ہزارہ نوں سپیکر شپ سنے سارے اہم عہدے دتے گئے جدکہ دوجے پاسے جنوبی ضلعیاں نوں مخصوص سیٹاں وچ وی نظر انداز کیتا گیا اے۔ شاہ محمد وزیر نے پارٹی نوں خبردار کیتا کہ بنوں وچ این اے 35دی سیٹ خطرے وچ اے،ضمنی الیکشن وچ تحریک انصاف ہتھوں نکل سکدی اے۔ چیتے رہوے کہ این اے 35توں عمران خان نے ایم ایم اے دے امیدوار اکرم خان درانی نوں ہرایا سی۔ پر بعدوں عمران خان نے بنوں والی سیٹ چھڈ دتی سی، جیہدے اُتے ہن ضمنی الیکشن ہوئے گا۔
