پیپلز پارٹی توں وکھ ہور اپوزیشن جماعتاں نے مولانا فضل الرحمان نوں صدارتی امیدوار لئی نامزد کر دتا

اسلام آباد(پاکستان پوائنٹ نیوز27۔اگست۔2018ء) اپوزیشن جماعتاں دا اتحاد ناکام ہو گیا۔ کئی دناں مگروں وی اپوزیشن صدارتی امیدوار لئی اک نہ ہو سکی۔ پیپلز پارٹی توں وکھ ہور اپوزیشن جماعتاں نے مولانا فضل الرحمان نوں صدارتی امیدوار لئی نامزد کر دتا۔ میڈیا رپورٹس مطابق سانجھے صدارتی امیدوار لئی اپوزیشن اتحاد وچ پُھٹ پے گئی اے۔ پیپلز پارٹی دے اعتزاز احسن نے اپنے کاغذات نامزدگی جمع کًروا دتے جدکہ ہور حزب اختلاف دیاں جماعتاں نے مولانا فضل الرحمان نوں اپنا امیدوار نامزد کر دتااے۔

وسیلیاں مطابق پاکستان پیپلز پارٹی نے مولانا فضل الرحمان نوں اپوزیشن جماعتاں ولوں سانجھے صدارتی امیدوار بنان دی مخالفت کیتی پر ہور سیاسی جماعتاں اوہناں دے ناں اُتے راضی ہو گئیاں۔ چیتے رہوے کہ مولانا فضل الرحمان نے اج ہائی کورٹ وچ اپنے کاغذات نامزدگی جمع کروائے جدکہ پیپلز پارٹی اعتزاز احسن دے کاغذات نامزدگی پہلے ای اسلام آباد ہائی کورٹ وچ جمع کروا چکی اے۔