لاہور(پاکستان پوائنٹ نیوز27۔اگست۔2018ء) پاکستان تحریک انصاف دے چیئرمین و وزیر اعظم عمران خان دی گھر والی بشری بی بی لئی 70اونٹھاں دا صدقہ دتا جائے گا ۔ قومی اخبار دی اک رپورٹ مطابق تھنکرز کلب عمران خان دی بیوی بشری بی بی دی لمی عمر لئی 70 اونٹھاں دا صدقہ دیوے گا تاں جے اوہناں دے راہ وچ آن والیاں قومی و بین الاقوامی سازشاں دا خاتمہ ہوئے تے یزیدی طاقتاں دیاں سازشاں توں نجات ملے۔
ایس گل دا فیصلا تھنکرز کلب علامہ اقبال ٹاؤن دے اجلاس وچ صدر محمد سلیم چوہان دی صدارت ہیٹھ کیتا گیا۔ اجلاس وچ یاسر ارشاد، شفیق جرال سنے ہور لوکاں نے رلت کیتی۔ اجلاس وچ صدر سلیم چوہان نے جمعیت علمائے اسلام پاکستان دے سربراہ قاری زوار بہادر نال ہون والی ملاقات دی تفصیلی رپورٹ پیش کیتی۔اوہناں نے آکھیا کہ سیاست دے ناں اُتے فساد کھلارن والیاں مذہبی جماعتاں نوں عالمی اسٹیبلشمنٹ دا مہرہ بن کے ملک وچ خانہ جنگی دی اگ لان دی اجازت نہیں دتی جائے گی۔ اجلاس وچ 70اونٹھ ذبح کرکے صدقے وچ دین دی ذمے واری آزاد کشمیر تھنکر کلب دے صدر شفیق جرال نوں دتی گئی۔ تھنکرز کلب دے ارکان نے اپوزیشن نوں صلاح دتی کہ جمہوریت دے ناں اُتے کرپشن نہ کرو تے ہن ہور دس سال اُڈیک وچ بیٹھو۔
