اسلام آباد(پاکستان پوائنٹ نیوز27۔اگست۔2018ء) وفاقی وزیر خزانہ اسد عمر نے کرنسی نوٹاں دی تبدیلی دیاں خبراں نوں جھوٹھ قرار دے دتا۔ پارلیمنٹ ہاؤس دے باہر میڈیا نال گل بات کردے ہوئے وفاقی وزیر خزانہ اسد عمر کولوں پرچا کار نے نویں کرنسی نوٹاں بارے سوال کیتا، جیہدے اُتے اسد عمر نے آکھیا کہ نویں کرنسی نوٹاں بارے جو خبر چل رہی اے اوہ میرے علم وچ نہیں اے۔
کرنسی نوٹاں دی تبدیلی بارے انج دی کوئی خبر میرے تیکر نہیں اپڑی ۔اوہناں دا کہنا سی کہ ایہ جو میں وٹس ایپ گروپاں تے سوشل میڈیا اُتے ویکھنا واں اُنجدا کُجھ وی نہیں اے۔ اسد عمر نے ہور آکھیا کہ جعلی نوٹ جس رنگ وچ وی ملن چنگے لگدے نیں۔ یاد رہوے کہ سوشل میڈیا اُتے پچھلے کئی دناں توں کرنسی نوٹاں دیاں کُجھ تصویراں گھم رہیاں نیں۔ ایہناں نوٹاں وچ پاکستانی ثقافت نوں پروموٹ کیتا گیا اے پر ایہناں کرنسی نوٹاں دا اک منفی پہلو ایہ اے کہ اوہناں اُتے بابائے قوم قائداعظم محمد علی جناح دی تصویر کیتے نہیں اے۔
