لاہور(پاکستان پوائنٹ نیوز27۔اگست۔2018ء) شریک چیئرمین پیپلز پارٹی آصف زرداری صدارتی امیدوار لئی اعتزاز احسن دے ناں اُتے اَڑ گئے۔ اوہناں نے آکھیا کہ مولانا فضل الرحمن دے کردار اُتے ہمیشہ سوالیہ نشان رہوے گا، اعتزاز احسن لئی پی ٹی آئی سنے ساریاں پارلیمانی جماعتاں نال رابطہ کراں گے۔ میڈیا رپورٹس مطابق اوہناں نے اج ایتھے گل بات کردے ہوئے آکھیاکہ اعتزاز احسن ای پیپلز پارٹی دے امیدوار نیں۔
صدارتی انتخاب لئی پی ٹی آئی سنے ساریاں پارلیمانی جماعتاں نال رابطہ کیتا جائے گا۔ آصف زرداری نے آکھیاکہ مولانا فضل الرحمان دے ایس کردار اُتے ہمیشہ وڈا سوالیہ نشان رہوے گا۔ اوہناں نے پچھلے دیہاڑے وی (ن) لیگ نوں خبردار کیتا سی کہ اعتزاز احسن دے ناں اُتے من جاؤ ، ضد چنگی نہیں ہوندی۔ سابق صدر آصف زرداری نے واضح کیتا کہ اوہ کیوں اعتزاز احسن دا ناں واپس لین اُتے تیار نہیں۔
اوہناں نے آکھیا کہ اعتزاز احسن اوس ویلے نواز شریف دے وکیل بنے جدوں اوہ ڈکٹیٹر مشرف دے قیدی سن۔ (ن) لیگ اوہ سبھ کُجھ بُھل گئی جو اعتزاز احسن تے پیپلز پارٹی نے اوہناں لئی کیتا۔ پیپلز پارٹی دی قیادت تے مرکزی رہنما وی اعتزاز احسن دے حق وچ نیں۔ آصف زرداری نے آکھیا کہ (ن) لیگ نوں سمجھنا چاہیدا سیاست وچ ضد چنگی نہیں ہوندی۔ پارٹی وسیلیاں مطابق سابق صدر آصف زرداری نے آکھیاکہ سیف الرحمان نے میری زبان کٹوائی، مینوں ختم کرن دا منصوبہ بنوایا۔
شہباز شریف نے بیاناں وچ کئی وار میری توہین کیتی پر میں معاف کیتا۔ بے نظیر بھٹو نوں نواز شریف تے اوہناں دے ساتھیاں نے کس طرحاں تنگ کیتا اسیں معاف کیتا۔ اوہناں دا کہنا سی کہ نواز شریف کالا کوٹ پا کے میمو گیٹ وچ سپریم کورٹ گئے تے اسیں فیر وی معاف کیتا۔ پی پی پی وسیلیاں مطابق آصف زرداری نے آکھیا کہ (ن) لیگ نے وزیر اعظم دے چناؤ وچ ساڈے کولوں ووٹ ای نہیں منگے۔ شہباز شریف نے ووٹ لئی آصف زرداری نوں فون تیکر نہیں کیتا۔
