اورنج لائن میٹر و ٹرین منصوبے وچ دیر،7,6مہینے ہور لگن گے

اورنج لائن میٹر و ٹرین منصوبے وچ دیر،7,6مہینے ہور لگن گے

لاہور(پاکستان پوائنٹ نیوز25۔اگست۔2018ء) لاہور وچ جاری اورنج لائن میٹرو ٹرین منصوبے وچ اجے دیر اے۔ تفصیل مطابق اورنج لائن ٹرین دے پیکجز اُتے کم بند پیا اے۔ سول ورک نوں پوا کرن لئی تعمیراتی کمپنیاں نوں ہور چار مہینے چاہیدے نیں۔ پیکج ٹو چوبرجی توں علی ٹاؤن وی اوکڑاں دا شکار اے۔ پیکج ٹو دا صرف 78فیصد کم ہو سکیا۔رپورٹ مطابق چینی کمپنی سی آر نورنکو نے وی ٹیسٹ رن لئی تن مہینے دا ویلا منگیا اے۔

کمپنی مطابق ٹیسٹ رن لئی خالی اورنج لائن ٹرین تن مہینے لئی پٹریاں اُتے چلائی جائے گی۔ پیکج تھری ڈیرہ گجراں ڈپو تے پیکج فور سٹبلنگ یارڈ اُتے تعمیراتی کم ٹھپ ہو گیا اے۔ پرائیویٹ کنٹریکٹرز نے ڈپو تے یارڈ اُتے 85فیصد کم کرن مگروں روک دتا۔ایس توں وکھ تنخاہواں نہ ملن اُتے انجینئرز تے عملے نے کم چھڈ دتا۔یاد رہوے کہ پچھلی صوبائی حکومت نے اپنی ولوں تے اورنج لائن ٹرین منصوبے دے ادھے ٹریک دا افتتاح وی کر دتا سی۔منصوبہ 2015وچ شروع ہویا۔جو دو سال وچ پورا ہونا سی۔ پر سپریم کورٹ دے نوٹس لین اُتے کئی انکشافات ساہمنے آئے۔ میڈیا رپورٹ وچ دسیا گیا سی کہ اورنج لائن ٹرین اُتے سفر کرن لئی شہریاں نوں اجے ہور 6توں 7مہینے اُڈیک وچ رہنا پئے گا۔