لاہور(پاکستان پوائنٹ نیوز25۔اگست۔2018ء) ”آرام حرام ہے“ ساڈا نواں سلوگن اے، سکون نال بیٹھاں گا نہ کسے نوں آرام کرن دیواں گا۔ تفصیل مطابق وفاقی وزیر ریلوے شیخ رشید نے آکھیا اے کہ ”آرام حرام ہے“ ساڈا نواں سلوگن اے، سکون نال بیٹھاں گا نہ کسے نوں آرام کرن دیواں گا۔ ایہناں خیالاں دا اظہار اوہناں نے ریلوے ہیڈ کوارٹر وچ اہم اجلاس دی صدارت کرد ے ہوئے کیتا۔
ایس موقعے تے افسراں ولوں وفاقی وزیر نوں بریفنگ وی دتی گئی۔وفاقی وزیر نوں نویں بنن تے اپ گریڈ ہون والے ریلوے سٹیشناں دے حوالے نال وی بریفنگ دتی گئی۔ شیخ رشید نے آکھیا کہ آمدن ودھانا تے کسارا(خسارہ) گھٹ کرنا میرا نشانہ اے تے افسر ایہدے لئی تعاون کرن۔ محکمہ اپنے خرچے گھٹ کرے تے سارا زور آمدن ودھان اُتے لائے۔ مارکیٹ سٹرٹیجی تے فریٹ ٹریناں اُتے میرا خاص فوکس ہوئے گا۔
اوہناں نے آکھیا کہ افسر ریلوے دے خول توں باہر نکل کے ویکھن ۔ پرائیویٹ سیکٹر نوں متوجہ کرن ۔ اوہناں لئی چنگا ماحول بنان۔ اوہناں نے آکھیا کہ ریلوے دی قیمتی زمین اُتے کمرشل پلازے بنان دی ضرورت اے تے اوہدے نال آمدن ودھے گی۔ شیخ رشید نے افسراں نوں ہدایت کیتی کہ سٹیشناں نیڑے گندگی ختم کرن لئی چھیتی صفائی ٹاسک فورس بناؤ۔ اوہناں نے آکھیا کہ دس سال بعد ریلوے وچ پیر رکھیا اے بہت سارے مسائل اوتھے کھلوتے نیں جتھے چھڈ کے گیا سی۔ اوہناں نے آکھیا کہ ریلوے دے سارے ہسپتالاں دی نجکاری کرو پر مزدور نہ نقصان نہ ہوئے۔ اوہناں دا ہور کہنا سی کہ مینوں ریلوے ہیڈ کوارٹر وچ کوئی افسر آرام کردا نظر نہ آئے سارے فیلڈ وچ تے ریلوے لئی بزنس لیان۔
