لاہور(پاکستان پوائنٹ نیوز21۔اگست۔2018ء) پاکستان مسلم لیگ (ن) نے نواز شریف لئی ”انصاف دو تحریک“ شروع کرن دا فیصلا کر لیا۔عید مگروں احتجاجی تحریک دا پہلا جلسہ راولپنڈی وچ ہوئے گا، ’انصاف دو‘ تحریک وچ اپوزیشن جماعتاں نوں رلتی ہون دی وی دعوت دتی جائیگی۔ تفصیل مطابق مسلم لیگ (ن) دے صدر شہباز شریف دی صدارت ہیٹھ اج مسلم لیگ (ن) دا اجلاس ہویا۔
اجلاس وچ پیپلز پارٹی دے صدارتی امیدوار دی حمایت نہ کرن تے نواز شریف دی رہائی سنے اہم فیصلے کیتے گئے۔ ایس موقعے تے اجلاس وچ مسلم لیگ (ن) نے اعتزاز احسن دا ناں صدارتی امیدوار لئی رد کیتا۔ وسیلیاں مطابق اجلاس وچ فیصلا کیتا گیا کہ اعتزاز احسن دی حمایت نہیں کیتی جائے گی۔ پیپلز پارٹی نے اعتزاز احسن دے ناں اُتے اعتماد وچ نہیں لیا۔ اعتزاز احسن دھرنے وچ وی اپوزیشن نوں ونڈن دے ایجنڈے اُتے سن۔
اجلاس وچ اعتزاز احسن دے ناں اُتے تحفظات دا اظہار وی کیتا گیا۔ جیہدے مگروں اوہناں دا ناں صدارتی امیدوار دے طور اُتے رد کیتا گیا۔ مسلم لیگ (ن) نے پیپلز پارتی نوں تجویز دتی اے کہ صدارتی امیدوار دی متفقہ نامزدگی پاکستان الائنس راہیں کیتی جائے۔مسلم لیگ (ن) نے خبردار کیتا کہ پیپلز پارٹی نے اتفاق نہ کیتا تے (ن) لیگ عبدالقادر بلوچ نوں صدارتی امیدوار لیائے گی۔
ایس طرحاں اجلاس وچ فیصلا کیتا گیا کہ پاکستان الائنس دا اجلاس 24اگست نوں مری یاں اسلام آباد وچ ہوئے گا۔ وسیلیاں دا کہنا ا ے کہ پاکستان الائنس دے ہر اجلاس وچ ساریاں اپوزیشن جماعتاں دی قیادت رلت(شرکت) دی پابندہوئے گی۔ ایس توں وکھ اجلاس وچ مسلم لیگ (ن) نے سابق وزیر اعظم و پارٹی قائد نواز شریف لئی ’انصاف دو‘ تحریک شروع کرن دا فیصلا کیتا اے۔ لوکائی نوں تحریک وچ دسیا جائے گا کہ نواز شریف دا احتساب نہیں ہو رہیا، بلکہ نواز شریف توں انتقام لِتا جا رہیا اے۔ مسلم لیگ (ن) نے آکھیا کہ زرداری دی چھٹی والے دن ضمانت ہو جاندی اے پر نواز شریف نوں انصاف نہیں لبھدا۔ اجلاس وچ آکھیا گیا کہ نواز شریف تے مریم نواز دا ناں ای سی ایل وچ پانا انتقامی کارروائی اے۔
