لاہور(پاکستان پوائنٹ نیوز21۔اگست۔2018ء) محکمہ موسمیات نے عید دے دناں وچ بارشاں دی پیشنگوئی کیتی اے۔ تفصیل مطابق بدھ دے دیہاڑے پاکستان بھر وچ مسلمان وڈی عید منان دے نال نال قربانی کرن گے۔ پر ہن پاکستانیاں لئی اک ہور خشخبری سُنا دتی گئی اے۔ محکمہ موسمیات نے عید دے دناں وچ بارشاں دی پیشنگوئی کیتی اے۔ محکمہ موسمیات مطابق ہن مون سون ہواواں ملک دے اُتلے (بالائی) علاقے وچ داخل ہو گئیاں نیں۔
بارشاں دا ایہ سلسلا پورا ہفتہ جاری رہوے گا۔ مون سون بارشاں وچ جمعے دے دیہاڑے ہور وادھا ہو جائے گا۔ جدکہ بدھ، جمعرات نوں اسلام آبادتے کشمیر وچ وی بارش دی آس اے۔ بدھ، جمعرات نوں راولپنڈی، گوجرانوالا، لاہور وچ وی بارش دی آس اے۔ ایس توں وکھ حکومت نے وڈی عید دیاں چھٹیاں دوران بجلی دی لوڈشیڈنگ نہ کرن دی ہدایت کیتی اے۔ فیسکو، لیسکو، میپکو، حیسکو، گیپکو،آئیسکوسنے سارے ڈسکوز دے چیف ایگزیکٹوز نوں آکھیا گیا اے کہ اوہ وڈی عید، ٹروتے مرو والے دن بجلی دی لوڈشیڈنگ نہ کرن۔
حکومت ولوں واپڈا حکام نوں ہدایت کیتی گئی اے کہ سارے متعلقہ واپڈ ا حکام نوں سختی نال ہدایت کیتی جائے کہ اوہ عید دے دناں وچ بجلی بند کرن توں پرہیز کرن تاں جے مسلمان سکون نال سنت ابراہیمی ادا کر سکن۔ واپڈا وسیلیاں نے دسیا کہ ساریاں پاور ڈسٹری بیوشن کمپنیاں نوں اج دی رات وی بجلی دی لوڈشیڈنگ نہ کرن دی ہدایت کیتی گئی اے تاں جے قربانی دے جنوراں دی ویچ وٹک(خریدو فروخت) تے بازاراں وچ عید شاپنگ لئی آن والے لوکاں نوں پریشانی دا ساہمنا نہ کرنا پئے۔
