لاہور(پاکستان پوائنٹ نیوز21۔اگست۔2018ء) قومی اخبار دی اک رپورٹ وچ دسیا گیا اے کہ سپریم کورٹ وچ سابق ایم پی اے سیمل کامران دی راجا بشارت خلاف درخاست دی سنوائی دوران سیمل کامران عدالت وچ روندیاں تے بے ہوش ہو کے ڈگن دی اداکاری کردیاں رہیاں۔ چیف جسٹس میاں ثاقب نثار نے آکھیا کہ میں کیہڑی مصیبت وچ پھس گیا واں۔ تہاڈا مطلب اے کہ میں انسانی حقاں دیاں درخاستاں نہ سُناں۔
رپورٹس وچ ہور دسیا گیا اے کہ سیمل کامران نے عدالت توں بینتی کیتی کہ میری راجا بشارت نال علیحدہ ملاقات کروائی جائے۔ راجا بشارت میرے نال ویاہ نوں من چکے نیں۔ جیہدے اُتے چیف جسٹس نے آکھیا کہ تُسیں چُپ ہو جاؤ ایہ عدالت اے اسمبلی دا فورم نہیں اے۔ چیف جسٹس پاکستان جسٹس میاں ثاقب نثار نے سابق رکن اسمبلی سیمل کامران تے موجودہ رکن پنجاب اسمبلی راجا بشارت دے مبینہ نکاح دے حوالے نال فیملی کورٹ نوں تن مہینے وچ کیس دا فیصلا کرن دا حکم دتا۔
عدالت نے نکاح نامے تے ہور کاغذاں دا فرانزک ٹیسٹ کروان دی وی ہدایت کیتی۔ یاد رہوے کہ ایس توں پہلے متعلقہ کیس دی سنوائی دوران چیف جسٹس پاکستان میاں ثاقب نثار دی سربراہی وچ قائم بنچ نے سابق ایم پی اے سیمل کامران ولوں سابق صوبائی وزیر راجا بشارت خلاف دائر درخاست اُتے سنوائی دوران فریقاں نوں رضا مندی نال معاملا حل کرن دی ہدایت کیتی سی۔ سیمل کامران نے عدالت نوں دسیا سی کہ منکوحہ ہون مگروں وی راجا بشارت مینوں بیوی نہیں من رہیا ۔ ویاہ دا پتا مسلم لیگ (ق) دے چودھری برادران نوں وی اے۔جیہدے اُتے عدالت نے ریمارکس دتے سن کہ فیر چودھری شجاعت تے پرویز الہی نوں وی سد لینے آں۔
