ایون فیلڈ ریفرنس وچ سزا معطلی دا فیصلا محفوظ

ایون فیلڈ ریفرنس وچ سزا معطلی دا فیصلا محفوظ

اسلام آباد(پاکستان پوائنٹ نیوز20۔اگست۔2018ء) اسلام آباد ہائی کورٹ نے ایوان فیلڈ ریفرنس وچ شریف خاندان دی سزا معطلی دا فیصلا محفوظ کر لیا اے۔ جسٹس اطہر من اللہ نے ریمارکس دتے کہ اسیں سزا معطلی دیاں درخاست اُتے مناسب فیصلا جاری کراں گے۔ میڈیا رپورٹس مطابق ایس توں پہلاں اسلام آباد ہائی کورٹ وچ جسٹس طاہر من اللہ تے جسٹس میاں گل حسن اورنگزیب دی سربراہی وچ 2 رکنی بنچ نے کیس دی سنوائی کیتی۔

عدالت دا کہنا سی کہ کیس دی سنوائی عیدوں بعد کیتی جائے گی۔ جسٹس اطہر من اللہ نے ریمارکس دتے کہ اپیلاں گرمیاں دیاں چھٹیاں مگروں سُنیاں جان گیاں پر عدالت نے نواز شریف، مریم نواز تے کیپٹن (ر) صفدر دیاں درخاستاں اُتے فیصلا محفوظ کر لیا اے۔ جسٹس اطہر من اللہ نے ریمارکس دتے کہ اسیں مناسب حکم نامہ جاری کراں گے۔ نہیں چاہندے دوجے فریق دا کیس متاثر ہوئے۔

اوہناں نے آکھیا کہ اسیں سزا معطلی دیاں درخاستاں اُتے مناسب فیصلا جاری کراں گے۔ایس توں پہلاں اج احتساب عدالت وچ پیشی مگروں اڈیالا جیل جان توں پہلاں عدالت دے باہر سابق وزیر اعظم نواز شریف نے میڈیا نال غیر رسمی گل بات کردے ہوئے آکھیا کہ میں وزیراعظم ہاؤس دے خرچے اپنے کولوں کردا سی تے اوہدے ثبوت چیکس دی صورت وچ موجود نیں۔ پرچاکار نے سابق وزیر اعظم کولوں سوال کیتا کہ سُنیا اے تُسیں عید ساڈے نال منا رہے او؟جیہدے اُتے نواز شریف نے آکھیا کہ اللہ تہاڈی زبان مبارک کرے۔

ایس موقعے تے اک پرچا کار نے سوال کیتا کہ وزیر اعظم نے ساریاں گڈیاں نیلام کرن دا اعلان کیتا اے جیہدے اُتے احسن اقبال نے آکھیا کہ صرف گلاں ای ہون گیاں عمل کُجھ نہیں ہوئے گا۔ ایس توں وکھ اج سویرے احتساب عدالت نمبر دو دے جج نے میاں نواز شریف خلاف نیب ریفرنسز کیس دی سنوائی کیتی۔ ایس موقعے تے خواجا حارث دی دوویں ریفرنسز دا فیصلا اکٹھے سُنن دی استدعا منظور کیتی گئی۔

احتساب عدالت نے دوویں ریفرنسز دا فیصلا اکٹھے سُنان دا حکم جاری کیتا۔ ایس موقعے تے خواجا حارث نے دلائل دیندے ہوئے آکھیا کہ احتساب عدالت نمبر 1نے وی تنوں ریفرنسز دا فیصلا اکٹھا سُنان دا فیصلا کیتا سی پر عدالت نے صرف ایون فیلڈ ریفرنس دا فیصلا سُنایا۔ اوہناں نے ہور آکھیا کہ تنوں ریفرنسز دا فیصلا اکٹھا نہ آن دی وجہ توں ہور 2ریفرنسز ایس عدالت منتقل ہوئے۔ ریفرنس دی سنوائی لئی سابق وزیراعظم نوں اڈیالا جیل توں احتساب عدالت لیاندا گیا۔ ایس توں پہلاں اڈیالا جیل دے باہر دو بندیاں نے نواز شریف دے قافلے اُتے پُھل سُٹے پر پولیس اہلکاراں نے دوویں بندیاں نوں گرفتار کر لیا۔