اسلام آباد(پاکستان پوائنٹ نیوز20۔اگست۔2018ء) نویں چُنے گئے وزیر ریلوے شیخ رشید احمد دا حلف چُکن مگروں میڈیا نال گل بات کردے ہوئے کہنا سی کہ ریلوے وچ سیاسی مداخلت برداشت نہیں کیتی جائے گی۔ تفصیل مطابق نویں چُنے گئے وزیر ریلوے شیخ رشید دا کہنا سی کہ پاکستان ریلوے نوں سرمایہ کاری لئی کھولنا چاہیدا۔ مال گڈیاں دی گنتی ڈبل کرن دی ضرورت اے۔شیخ رشید نے آکھیا کہ ریلوے نوں جدت پسندی نال بدلیا جاسکدا اے۔
ادارے وچ کرپشن نوں سارے درجات اُتے ختم کیتا جائے گا۔ ایہدے نال ای اوہناں نے اعلان کیتا کہ اوہ ریلوے وچ کسے قسم دی سیاسی مداخلت برداشت نہیں کرن گے۔ چیتے رہوے کہ16رکنی وفاقی کابینہ نے اج اپنے عہدے دا حلف چُک لیا۔ صدر مملکت ممنون حسین نے ایوان صدر وچ وفاقی کابینہ دے ارکان کولوں حلف لیا۔ ایس موقعے تے وزیر اعظم عمران خان وی موجود سن۔ تقریب وچ سپیکر قومی اسمبلی اسد قیصر، ڈپٹی سپیکر قومی اسمبلی قاسم سوری، نامزد گورنر سندھ عمران اسماعیل، نامزد گورنر پنجاب چودھری سرور، سیاسی رہنماواں، ارکان پارلیمان تے سینئر حکام نے رلت کیتی۔
حلف چُکن والے وفاقی وزیراں وچ مخدوم شاہ محمود قریشی(خارجا امور)پرویز خٹک(دفاع) اسد عمر(خزانہ ، ریونیو و اقتصادی امور) ڈاکٹر فہمیدہ مرزا(بین الصوبائی رابطہ)شیخ رشید احمد(ریلوے)خالد مقبول صدیقی(انفارمیشن ٹیکنالوجی و مواصلات) شفقت محمود(وفاقی تعلیم و پیشہ وارانہ تربیت، قومی تاریخ و ادبی ورثہ)فواد احمد (اطلاعات ونشریات)زبیدہ جلال( دفاعی پیداوار) غلام سرور خان(پٹرولیم و قدرتی وسائل)ڈاکٹر شیریں مزاری(انسانی حقوق) نور الحق قادری(مذہبی امور و بین المذاہب ہم آہنگی)چودھری طارق بشیر چیمہ(ریاستیں و سرحدی علاقہ جات)سینیٹر ڈاکٹر محمد فروغ نسیم(قانون و انصاف) عامر محمود کیانی(قومی صحت، خدمات، ریگولیشن و کوآرڈینیشن)خسرو بختیار شامل نیں جدکہ محمد شہزاد ارباب نوں اسٹیبلشمنٹ، عبدالرزاق داؤد کامرس، ٹیکسٹائل، صنعت و پیداوار و سرمایہ کاری، ڈاکٹر عشرت حسین ادارہ جاتی اصلاحات وکفایت شعاری، امین اسلم ماحولیاتی تبدیلی تے ظہیر الدین بابر اعوان نوں پارلیمانی امور دے مشیر دے طور اُتے مقرر کیتا گیا۔
