اسلام آباد(پاکستان پوائنٹ نیوز20۔اگست۔2018ء) ایفی ڈرین کیس وچ قید حنیف عباسی دی جیل وچ طبیعت وگڑ گئی ۔ میڈیا رپورٹس مطابق حنیف عباسی دی اک وار فیر جیل وچ طبیعت وگڑ گئی۔لیگی رہنما نوں راولپنڈی انسٹی ٹیوٹ آف کارڈیالوجی منتقل کیتا جا رہیا اے۔وسیلیاں مطابق حنیف عباسی جیل جان توں پہلاں ای دل دے روگ دا شکار سن۔ پر اج طبیعت وگڑن اُتے اوہناں نوں ہسپتال منتقل کیتا جا رہیا اے جیہدے مگروں ہسپتال وچ اوہناں دا علاج کیتا جائیگا۔
چیتے رہوے کہ ایس توں پہلاں حنیف عباسی دی جیل وچ طبیعت خراب ہوئی سی۔ دسیا گیا سی کہ حنیف عباسی پولن الرجی دا شکار سن۔ گلے وچ ٹانسلز دی وجہ توں حنیف عباسی نوں ساہ لین وچ اوکڑاں دا ساہمنا سی۔ حنیف عباسی دا جیل دے ہسپتال وچ ای علاج کیتا گیا سی۔یاد رہوے کہ مسلم لیگ (ن) دے رہنما حنیف عباسی نوں راولپنڈی دی انسداد دہشت گردی عدالت نے ایفی ڈرین کیس وچ عمر قید دی سزا سُنائی سی۔
