بنی گالا: وزیر اعظم عمران خان اُتے حملاکرن دی نیت نال آن والے بندے گرفتار

گرفتار کیتے گئے بندے افغانستان توں آئے سن:مشہور پرچا کار دا انکشاف

بنی گالا: وزیر اعظم عمران خان اُتے حملاکرن دی نیت نال آن والے بندے گرفتار
گرفتار کیتے گئے بندے افغانستان توں آئے سن:مشہور پرچا کار دا انکشاف

اسلام آباد(پاکستان پوائنٹ نیوز20۔اگست۔2018ء) مشہور پرچاکار حامد میر نے وزیر اعظم عمران خان دی تقریر اُتے تبصرہ کردے ہوئے آکھیا کہ بطور وزیراعظم ایہ عمران خان دی پہلی تقریر سی۔ میرے خیال نال اج عمران خان اپنے سیاسی مخالفاں نال مخاطب نہیں سن۔ بلکہ اوہ پاکستان دے اک عام بندے نال مخاطب سن۔ اوہناں نے اپنی تقریر وچ بالاں تے بیوہ سوانیاں نال گل بات کیتی۔

حامد میر دا ہور کہنا سی کہ عمران خان نے سبھ توں اہم اعلان ایہ کیتا اے کہ اوہ وزیر اعظم ہاؤس دیاں 80گڈیاں وچوں صرف 2گڈیاں استعمال کرن گے تے 524ملازماں وچوں صرف دو ملازم رکھن ے جدکہ عمران خان نے ایہ وی آکھیا کہ میں وزیر اعظم ہاؤس نوں یونیورسٹی بناواں گا جیہدے اُتے کُجھ لوک اوہناں دا مذاق اڈا رہے نیں تے آکھ رہے نیں ایہ وزیراعظم ہاؤس تے ریڈ زون وچ تے ایہنوں کیویں یونیورسٹی بنایا جا سکدا اے۔

پر میرے خیال وچ ایہو اصل چیلنجز نیں۔ حامد میر دا کہنا سی کہ عمران خان دی جان نوں خطرہ انتخابی مہم دوران وی سی ۔ عمران خان نوں آکھیا گیا کہ تُسیں سوات تے بنوں وچ جلسہ نہ کرو تے ایس حوالے نال عمران خان نوں بہت ڈرایا گیا جدکہ پچھلے دو ہفتیاں دوران بنی گالا دے اندروں تے باہروں کُجھ لوک گرفتار کیتے گئے نیں جو عمران خان اُتے حملا کرن دی نیت نال افغانستان توں آئے سن۔ عمران خان بالکل صحیح آکھ رہے نیں کہ اوہناں دی جان نوں خطرہ اے تے بہت ساریاں طاقتاں عمران خان دی جان دیاں دشمن بنیاں ہوئیاں نیں۔