اسلام آباد(پاکستان پوائنٹ نیوز18۔اگست۔2018ء) جعلی بنک اکاؤنٹس کیس وچ سابق صدر آصف علی زرداری دی حفاظتی ضمانت منظور ہو گئی اے۔ تفصیل مطابق سابق صدر آصف علی زرداری نے جعلی بنک اکاؤنٹس کیس وچ وارنٹ گرفتاری جاری ہون مگروں ضمانت درخاست جمع کروائی سی جیہنوں اسلام آباد ہائی کورٹ نے منظور کردے ہوئے آصف علی زارداری نوں حفاظتی ضمانت دے دتی اے۔
جسٹس میاں گل حسن اورنگزیب نے درخاست اُتے چیمبر وچ سنوائی کیتی۔ ضمانت منظور کرن اُتے آصف علی زرداری نوں متعلقہ عدالت وچ پیش ہون دا حکم دتا گیا۔ عدالت آمد اُتے پرچا کار نے سابق صدر کولوں سوال کیتا کہ تُسیں عدالتاں وچ پھر رہے او، دسو انج دیاں کارروائیاں کیوں ہو رہیاں نیں؟جیہدے اُتے آصف علی زرداری نے آکھیا کہ ایس طرحاں تے ہوندا اے، ایس طرحاں دے کماں وچ۔ سنوائی مگروں سابق صدر دی دھی آصفہ بھٹو نوں چیمبر وچ جان دی اجازت نہیں دتی گئی۔ دوجے پاسے آصف علی زرداری نے منی لانڈرنگ کیس وچ بینکنگ کورٹ وچ پیش ہون دا فیصلا کرلیا اے۔ سابق صدر بینکنگ کورٹ وچ پیش ہو کے عدالتی کارروائی دا ساہمنا کرن گے۔
