اسلام آباد(پاکستان پوائنٹ نیوز18۔اگست۔2018ء) وزیراعظم عمران خان نے اج اپنے عہدے دا حلف چُکیا لیا۔ حلف چُکن مگروں وزیر اعظم عمران خان دی کابینہ دے حوالے خبراں ساہمنے آ رہیاں نیں۔ میڈیا رپورٹ مطابق وزیر اعظم عمران خان دی نویں کابینہ وچ پاکستان تحریک انصاف دے وائس چیئرمین شاہ محمود قریشی نوں وزیر خارجا بنایا جائے گا ۔ اسد عمر نوں وزیر خزانہ جدکہ وزارت خارجا عمران خان اپنے کول ای رکھن گے۔
میڈیا وسیلیاں نے دسیا کہ عمران خان وزارت داخلا اپنے کول ای رکھن گے۔ عمران خان وزارت داخلا دے معاملات لئی مشیر رکھن گے۔ مشیراں لئی شعیب سڈل تے ناصر درانی دے ناواں بارے غور کیتا جا رہیا اے پر اجے حتمی فیصلا نہیں کیتا گیا۔پچھلے دیہاڑے اپنی کامیابی مگروں اسمبلی وچ خطاب کردے ہوئے عمران خان دا کہنا سی میں اج اپنی قوم تے سبھ توں پہلاں رب دا شکریہ ادا کرنا واں جیہنے مینوں موقع دتا۔
انشااللہ میں رب ساہمنے اپنی قوم نال وعدہ کرنا واں کہ جو تبدیلی اسیں لے کے آواں گے اوہ تبدیلی قوم ویکھے گی۔ ایس ملک وچ سبھ توں پہلاں اسیں کڑا احتساب کرنا اے۔ اوہ لوک جیہناں نے ایس ملک نوں لُٹیاتے مقروض کیتا اوہناں نوں کٹہرے وچ لیاواں گے۔عمران خان دا کہنا سی کہ میرا وعدہ اے کہ کسے قسم دا این آر او کسے ڈاکو نال نہیں ہوئے گا۔22سال کوشش کرکے میں ایتھے اپڑیا۔
مینوں کسے ملٹری ڈکٹیٹر نہیں پالیا۔ میں اوہناں لوکاں نوں جیہناں نے ایس ملک نوں لُٹیا حساب لواں گا ۔اوہناں دا کہنا سی کہ نہ میرا والد سیاست وچ سی نہ مینوں ڈکٹیٹر نے ایتھوں تیکر لیاندا۔ مینوں فخر اے کہ قائداعظم میرا ہیرو اے تے اوہنے میرے توں ودھ کوشش کیتی۔ باہر گیا پیسہ واپس لے کے آواں گے۔ ایس پارلیمنٹ نوں پاور دیواں گے۔ ہر مہینے دو وار سوالاں دے وقفے دوران سوالاں دا جواب دیواں گا۔
ایس ملک اُتے جو قرضہ چڑھان دے ذمے وار نیں اوہناں دا احتساب کراں گے۔ ایس ہاؤس وچ ایس بارے گل کراں گے کہ کیویں اوہناں ایس ملک نوں مقروض کیتا۔ اوہ پیسہ جو ہسپتالاں وچ جانا سی، انصاف لئی جانا سی، ملک اندر لوکاں نوں صاف پانی دین لئی جانا سی اوہ پیسہ لوکاں دیاں جیباں وچ گیا تے اسیں پارلیمنٹ وچ ایس بارے بحث کراں گے۔ ایس ملک اندر اک ایسا نظام بناواں گے تے قوم کولوں پیسہ اکٹھا کراں گے۔
قوم نوں پیراں اُتے کھڑا کراں گے۔ میں نوجواناں نوں پیغام دینا واں کہ اوہ نوجوان جیہناں دی وجہ توں میں اج ایتھے کھلوتاواں، کوشش کراں گا کہ اوہناں دا میں مستقبل ٹھیک کراں۔ نوجواناں نوں ایسے ملک اندر نوکریاں دیواں گے۔ عمران خان نے دھاندلی بارے اپوزیشن دے احتجاج اُتے آکھیا کہ2013دے الیکشن وچ ایہ لوک جو رولا پا رہے نیں اوہناں نے حلقے نہیں کھولے سانوں حلقے کھلوان وچ عدالتاں اندر جانا پیا۔
چارے حلقیاں وچ غیر قانونی ووٹ ملے۔ اودوں ایہناں نے احتساب کیوں نہیں کیتا۔ جوڈیشل کمیشن نے 40فائنڈنگ دتیاں، اوہدے وچوں اک سی کہ ڈھائی کروڑ ووٹ جعلی سن۔ اودوں دی گورنمنٹ نے کیوں ایکشن نہیں سی لیا۔ اوہناں دا کہنا سی کہ اسیں دھاندلی نہیں کیتی۔ تُسیں بھاویں الیکشن کمیشن کول جاؤ یاں سپریم کورٹ کول۔جو وی الیکشن لئی تفتیش کروانا چاہندا اے اسیں تعاون کراں گے۔ کیونکہ سانوں پتا اے کہ اسیں دھاندلی نہیں کیتی۔ پر آخیر اُتے میں ایہ گل کرنا چاہنا واں کہ کسے قسم دا بلیک میل نہ مینوں کوئی کر سکیا نہ کرے گا۔ میں شہباز شریف نوں کہنا چاہنا واں کہ تُسیں دھرنا دیو اسیں روٹی وی دیواں گے۔ سپورٹ کراں گے۔کنٹینر اسیں دیواں گے پر جو مرضی کر لوو تہانوں این آر او نہیں ملے گا۔
