تحریک انصاف دے قاسم خان سوری قومی اسمبلی دے ڈپٹی سپیکر چُنے گئے

تحریک انصاف دے قاسم خان سوری قومی اسمبلی دے ڈپٹی سپیکر چُنے گئے

اسلام آباد(پاکستان پوائنٹ نیوز15۔اگست۔2018ء) تحریک انصاف دے قاسم خان سوری قومی اسمبلی دے ڈپٹی سپیکر چُنے گئے۔ بدھ دے دیہاڑے قومی اسمبلی دے اجلاس دوران ہون والی ووٹنگ وچ تحریک انصاف دے امیدوار 183ووٹ لے کے کامیاب رہے، اپوزیشن دے امیدوار اسد محمود نوں 144ووٹ پئے۔ تفصیل مطابق اج قومی اسمبلی دے اجلاس وچ سپیکر و ڈپٹی سپیکر دا چناؤ کیتا گیا۔ تحریک انصاف دے اسد قیصر اسمبلی دے سپیکر جدکہ قاسم خان سوری ڈپٹی سپیکر قومی اسمبلی چُنے گئے۔

پاکستان تحریک انصاف دے امیدوار اسد قیصر نے 178جدکہ اپوزیشن امیدوار سید خورشید شاہ نے 148ووٹ لئے۔ایاز صادق نے نویں سپیکر قومی اسمبلی دے طور اُتے اسد قیصر دے ناں دا اعلان کیتا۔ سردار ایاز صادق نے نویں چُنے جان والے سپیکر اسمبلی کولوں عہدے دا حلف لیا، جیہدے مگروں ڈپٹی سپیکر قومی اسمبلی دے چناؤ لئی ووٹنگ شروع کیتی گئی۔ڈپٹی سپیکر دے چناؤ دوران قاسم سوری دے مقابلے وچ اپوزیشن دے امیدوار اسد محمود نوں ہار دا ساہمنا کرنا پیا۔

مولانا فضل الرحمان دے پُتر اسد محمودنوں اپوزیشن دے کل 146 وچوں 144ووٹ پئے۔ اپوزیشن دے دو ارکان نے اسد محمود دی حمایت وچ ووٹ نہیں دتا۔ چناؤ مکمل ہون مگروں سپیکر قومی اسمبلی اسد قیصر نے قاسم خان سوری کولوں ڈپٹی سپیکر قومی اسمبلی دے عہدے دا حلف لیا۔