لاہور(پاکستان پوائنٹ نیوز15۔اگست۔2018ء) پاکستان تحریک انصاف دے ایم پی اے محسن لغاری نے موجودہ پنجاب اسمبلی دی پہلی قرارداد جمع کروا دِتی اے۔ ایہہ قرارداد جنوبی پنجاب نوں وکھرا صوبہ بنان لئی جمع کروائی گئی اے۔ چیتے رہوے کہ پاکستان تحریک انصاف نے اپنے منشور وچ وی جنوبی پنجاب نوں وکھرا صوبہ بنان دا وعدہ کیتا سی تے ہن تحریک انصاف نے ایہدے اُتے عمل کرنا وی شروع کر دِتا اے۔
پنجاب وچ حلف چُکدیاں ای تحریک انصاف دے ایم پی اے محسن لغاری نے پنجاب اسمبلی وچ پہلی قرارداد پیش کر دِتی جیہڑی جنوبی پنجاب نُوں وکھرا صوبہ بنان بارے سی۔ واضح رہوے ایس توں پہلاں اِک رپورٹ وچ دسیا گیا سی کہ تحریک انصاف نے صوبہ جنوبی پنجاب دا مُڈھلا سیٹ اپ بناون دیاں تیاریاں شروع کردِتیاں۔ تحریک انصاف دے چیئرمین عمران خان ولوں 100 دِناں دے اندر صوبہ جنوبی پنجاب بناون نُوں مُکھ رکھدیاں صوبہ جنوبی پنجاب دا مُڈھلا سیٹ اپ بنان دیاں تیاریاں نوں عملی رُوپ دیون دا کم شروع کیتا اے۔
جیہدے مطابق پہلاں ملتان جو صوبہ جنوبی پنجاب دا مرکز اے،وچ ڈپٹی چیف سیکرٹری سطح دا افسر تعینات کرن توں وکھ صوبائی محکمے دا سیکرٹری وی تعینات کیتا جاوے گا تے گریڈ 17 تیک دے افسراں دے تقرر تے تبادلیاں دا اختیار ملتان وچ ایس سیکرٹریٹ اندر منتقل کیتا جاوے گا جیہدے وچ پولیس دے ڈی ایس پی لیول تے اسسٹنٹ کمشنرز دے تبادلے تقرریاں ایتھوں ای ہون گیاں۔
تے اج باقاعدہ طور تے جنوبی پنجاب نُوں وکھرا صوبہ بناون لئی قرارداد پیش کر دِتی گئی اے۔ جیہدے وچ وسائل دی ونڈ دا وی ذکر کیتا گیا اے۔ تحریک انصاف ایس عزم دا اظہار کر رہی اے کہ جنوبی پنجاب دا صوبہ ضرور بنے گا جد کہ عمران خان نے وی آکھیا سی کہ اقتدار سانبھن مگروں جنوبی پنجاب صوبے دا قیام اوہناں دیاں مُڈھلیاں ترجیحاں وچ شامل اے۔
