اسلام آباد( پاکستان پوائنٹ نیوز13۔اگست۔2018ء ) عمران خان نے شیخ رشید نوں وزارت داخلا دین توں صاف انکار کر دتا، پاکستان عوامی مسلم لیگ دے سربراہ من پسند وزارت نہ ملن اُتے تحریک انصاف دے سربراہ نال رُس پئے۔ تفصیل مطابق پاکستان تحریک انصاف دے اتحادی و عمران خان دے بیلی نوں الیکشن جتن مگروں جھٹکا لگا اے۔ عمران خان نے شیخ رشید نوں وزارت داخلا دین توں صاف انکار کر دتا اے۔
شیخ رشید الیکشن جتن مگروں میڈیا اُتے دعوے کردے رہے نیں کہ کسے مخصوص وزارت دی لالچ نہیں اے پر وسیلیاں مطابق اوہ اپنی من پسند وزارت لئی تحریک انصاف دے سربراہ و اپنے دوست عمران خان اُتے دباء پا رہے نیں۔پاکستان عوامی مسلم لیگ دے سربراہ شیخ رشید الیکشن جتن مگروں عمران خان توں منگ کر رہے نیں کہ اوہناں نوں وفاقی وزارت داخلا دا عہدہ دتا جائے۔ پر ہن وسیلیاں مطابق تحریک انصاف دے سربراہ و آؤندے وزیراعظم عمران خان نے اپنے بیلی و اتحادی شیخ رشید دی منگ منن توں انکار کر دتا اے۔ عمران خان نے شیخ رشید نوں وفاقی وزارت داخلا دا عہدہ نہ دین دا فیصلا کیتا اے۔ وفاقی وزارت داخلا دا عہدہ ممکنہ طور اُتے سابق وزیر اعلا خیبرپختونخوا پرویز خٹک نوں دتا جائے گا۔
