بنوں( پاکستان پوائنٹ نیوز13۔اگست۔2018ء ) جمعیت علمائے اسلام (ف) دے سربراہ مولانا فضل الرحمان نے عمران خان دی چھڈی ہوئی این اے 35بنوں دی سیٹ توں ضمنی الیکشن وچ حصہ لین دا فیصلا کیتا اے۔ تفصیل مطابق جے یو آئی (ف) دے سربراہ مولانا فضل الرحمان نوں اوہناں دی جماعت ولوں اک وار فیر پارلیمانی سیاست وچ لیان دی تیاری کیتی جا رہی اے۔ مولانا فضل الرحمان نامزد وزیراعظم عمران خان دی بنوں توں چھڈی گئی قومی اسمبلی دی سیٹ این اے 35توں ضمنی الیکشن لڑن گے، پر ایہدا حتمی فیصلا ایم ایم اے دے اجلاس وچ کیتا جائے گا۔
این اے 35توں تحریک انصاف دے سربراہ و آؤندے وزیر اعظم عمران خان نے سابق وفاقی وزیر اکرم خان درانی نوں ہرایا سی ۔ایس حوالے نال اکرم خان درانی نے اسمبلی وچ میڈیا نال گل بات کردے ہوئے دسیا کہ مولانا فضل الرحمان دا پارلیمانی سیاست وچ اہم کردار رہیا اے تے اوہناں دی اسمبلی وچ موجودگی ضروری اے۔ ایس لئی جے این اے دی سیٹ جت وی جاندا تے اوہناں لئی سیٹ چھڈ دیندا۔ اکرم درانی دا کہنا سی کہ ہن ایہدے لئی مولانا فضل الرحمان نوں این اے 35توں الیکشن لڑوان دا فیصلا کیتا جا رہیا اے تاں جے اوہ اسمبلی وچ اپنا کردار نبھا سکن۔
