اسلام آباد( پاکستان پوائنٹ نیوز13۔اگست۔2018ء ) اج قومی اسمبلی دے ارکان نے ایوان وچ بطور ممبر قومی اسمبلی حلف چُکیا اے۔ اج دے اجلاس دی خاص گل ایہدے وچ نویں چُنے گئے ارکان دی موجودگی سی۔ پر ایس موقعے تے پاکستان پیپلز پارٹی دی سندھ توں چُنی گئی رکن اسمبلی شازیہ مری دی پیپلز پارٹی دے انتخابی نشان تیر والی شرٹ ایوان وچ توجہ دا مرکز بنی رہی۔ پیر نوں قومی اسمبلی دے اجلاس وچ شازیہ مری نے جو شرٹ پائی سی اوہدے اُتے پیپلز پارٹی دا انتخابی نشان (تیر) بنیا ہویا سی۔
تے شرٹ ہیٹھاں انگریزی وچ پی پی پی لکھیا سی۔ ایس توں وکھ بلاول بھٹو زرداری وی اسمبلی دا حصہ بنے نیں۔بلاول بھٹو دے پہلی وار اسمبلی وچ جان تے حلف چُکن اُتے اوہناں دیاں بھیناں بہت خش وکھالی دتیاں۔ جیہدا وکھالا(اظہار) اوہناں نے اپنے ٹویٹر پیغام وچ وی کیتا۔ آصفہ بھٹو دا ا پنے ٹویٹر پیغام وچ کہنا سی کہ بلاول بھٹو تے اپنے والد آصف علی زرداری نوں قومی اسمبلی وچ حلف چُکدا ویکھ کے میں بہت خش آں تے ایہ خوشی بیان کرن لئی میرے کول اکھر نہیں نیں۔دوجے پاسے بختاور بھٹو نے وی ایس بارے ٹویٹ کردے ہوئے آکھیا کہ آصف علی زرداری پارلیمنٹ وچ حلف چُکن والے پہلے ممبر نیں۔ اوہناں نے ایس موقعے تے اپنی خشی دا اظہار کردے ہوئے آکھیا کہ مینوں فخر اے۔
