اسلام آباد( پاکستان پوائنٹ نیوز13۔اگست۔2018ء ) اج قومی اسمبلی دے ارکان نے ایوان وچ بطور ممبر قومی اسمبلی حلف چُکیا اے۔ نویں قومی اسمبلی دی سبھ توں اہم گل ایہ اے کہ ایہدے وچ ادھے توں ودھ نویں لوک نیں۔ تے ایہ لوک پارلیمنٹ دے پہلی وار ممبر چُنے گئے نیں۔ ایہناں ممبراں وچ پاکستان پیپلز پارٹی دے چیئرمین بلاول بھٹو زراری وی شامل نیں۔ بلاول بھٹو دے پہلی وار اسمبلی وچ جان تے حلف چُکن اُتے اوہناں دیاں بھیناں بہت خش وکھالی دتیاں۔ جیہدا وکھالا(اظہار) اوہناں نے اپنے ٹویٹر پیغام وچ وی کیتا۔ آصفہ بھٹو دا ا پنے ٹویٹر پیغام وچ کہنا سی کہ بلاول بھٹو تے اپنے والد آصف علی زرداری نوں قومی اسمبلی وچ حلف چُکدا ویکھ کے میں بہت خش آں تے ایہ خوشی بیان کرن لئی میرے کول اکھر نہیں نیں۔
دوجے پاسے بختاور بھٹو نے وی ایس بارے ٹویٹ کردے ہوئے آکھیا کہ آصف علی زرداری پارلیمنٹ وچ حلف چُکن والے پہلے ممبر نیں۔ اوہناں نے ایس موقعے تے اپنی خشی دا اظہار کردے ہوئے آکھیا کہ مینوں فخر اے۔
چیتے رہوے کہ ایس توں پہلاں آصفہ بھٹو نے اک ٹویٹ وچ آکھیا سی کہ اوہ پاکستان پیپلز پارٹی لئی تاریخی دن ہوئے گا جدوں ساڈے والد آصف علی زردای نال ذوالفقار علی بھٹو دے پوترے و شہید بے نظیر بھٹو دے پُتر بلاول بھٹو زرداری قومی اسمبلی وچ حلف چُکن گے۔
