پاکستان دے غیر ملکی قرضیاں وچ 5ارب ڈالر دی کمی

پاکستان دے غیر ملکی قرضیاں وچ 5ارب ڈالر دی کمی

کراچی( پاکستان پوائنٹ نیوز11۔اگست۔2018ء ) ملکی معیشت دی مجموعی صورتحال بہتری ول جا رہی اے ۔ ڈالر دے مقابلے وچ رُپئے دی قدر وچ وادھے نال ملکی قرضیاں دے بھار وچ 5ارب ڈالر دی کمی ہوئی اے۔ تفصیل مطابق الیکشن 2018دے نتیجے مگروں ملکی معاشی صورتحال وچ تبدیلی آئی اے۔ ایس تبدیلی مگروں ڈالر دی لگاتار ودھدی قیمت ناصرف رُکی بلکہ رُپئے دی قدر وی بہتر ہون لگی۔

25جولائی دے الیکشن مگروں اوپن مارکیٹ وچ 8 تے انٹر بنک مارکیٹ وچ ڈالر دی قیمت 5رُپئے تیکر گھٹ ہوئی اے۔ جیہدا اثر پاکستان دے غیر ملکی قرضیاں اُتے پیا تے ملکی قرضیاں دے بھار وچ 5ارب ڈالر دی کمی ہوئی۔ پاکستان سٹاک مارکیٹ جو لگاتار مندی دا شکار سی تے چالو ورھے دے ایس ای 100انڈیکس خطرناک حد تیکر38ہزار تیکر جا اپڑے۔ پر ہن ایہدے وچ تھوڑی بہتری مگروں تقریبن 5ہزار پوائنٹس اُتے نیں۔

جو چالو سال دا ریکارڈ اے۔ سٹیٹ بنک ولوں جاری آنکڑیاں(اعداد وشمار) مطابق ملکی زرمبادلا دے ذخائر وچ وی وادھا ہویا جیہدے مگروں زرمبادلا دے ذخائر 17ارب ڈالر توں ودھ گئے نیں۔ ملکی معیشت وچ بہتری دا اثر پٹرولیم وستاں دیاں قیمتاں اُتے وی پیا جو تیزی نال اُتے جا رہیاں سن پر پچھلے دو مہینے توں اک تھاں کھلوتیاں نیں۔ بھاویں عالمی مارکیٹ وچ تیل دیاں قیمتاں وچ تبدیلی مگروں اوگرا ولوں پچھلے مہینے قیمتاں ودھان دی تجویز دتی گئی سی جیہنوں نگران حکومت نے رد کیتا سی پر اوہنوں وی بہتری دے طور اُتے ویکھیا گیا۔