اسلام آباد( پاکستان پوائنٹ نیوز11۔اگست۔2018ء ) نجی ٹی وی دے پروگرام وچ گل بات کردے ہوئے مشہور پرچاکار محمد مالک نے آکھیا کہ میری اطلاع مطابق سابق وزیر اعظم نواز شریف دے پُتراں حسن تے حسین نواز نے ایون فیلڈ اپارٹمنٹس خالی کر دتے نیں تے اپنا سارا سامان اوتھوں منتقل کر کے کسے ہور تھاں رہنا شروع کر دتا اے۔ اوہناں نے آکھیا کہ حسن تے حسین نواز ولوں اک گھر مُل لیا گیا اے جدکہ دو ہور جائیداداں وی مُل لِتیاں جا رہیاں نیں۔
پر ہن مُل لتیاں جان والیاں جائیداداں اپنے ناں نہیں بلکہ کسے ہور ناں نال مُل لِتیاں جا رہیاں نیں۔ محمد مالک نے دسیا کہ حسن تے حسین نواز ولوں ایون فیلڈ اپارٹمنٹس ویچن دی اک بہت سنجیدہ کوشش کیتی جا رہی اے۔ میری اطلاع مطابق پاکستان دے سبھ توں وڈے رئیل سٹیٹ ٹائیکون نوں ایہ جائیداد مُل لین دی آفر کیتی گئی۔ پہلے تے اوہناں نے انکار کر دتا پر بعدوں فیر اوہناں نال رابطہ کیتا گیا کہ جے تُسیں اوہنوں لینا چاہو تے مُل لے لوو۔
محمد مالک دا کہنا سی کہ ایس منصوبے دا مقصد ایہ اے کہ ایون فیلڈ اپارٹمنٹس نوں کسے تیجی پارٹی دی ملکیت بنا دتا جائے تاں جے حکومت پاکستان جدوں ایہدے اُتے اپنا حق منگے تے ایس حوالے نال قانونی مسئلا کھڑا کر دتا جائے۔ اوہناں نے آکھیا کہ ایس سارے معاملے اُتے جمہوری حکومت بالکل چُپ اے تے سانوں بالکل وی ایس گل دا پتا نہیں اے کہ اینے تماشے مگروں ایون فیلڈ دا کیہ بنے گا؟پر ہن اوہ لوک جو ایون فیلڈ دے باہر احتجاج کر رہے سن اوہناں نوں صلاح اے کہ اوہ دوجی جائیداد لبھن۔ محمد مالک نے آکھیا کہ میری اطلاع مطابق 15اگست تیکر وکھا وی دتا جائے گا کہ حسن تے حسین نواز ایون فیلڈ راپارٹمنٹس خالی کر گئے نیں۔
