لاہور( پاکستان پوائنٹ نیوز10۔اگست۔2018ء ) امریکا نے پاکستان دا ملٹری ٹریننگ پروگرام معطل کر دتا، امریکا نے پاکستان نوں یو ایس نیول وار، نیول سٹاف کالج، سائبر سکیورٹی دے پروگراماں توں وی فارغ کر دتا اے ۔رائٹرز نے دعوا کیتا اے کہ ٹرمپ انتظامیہ نے خفیہ طور اُتے پاکستانی فوج دے افسراں دی ٹریننگ و ایجوکیشن پروگرام نوں معطل کر دتا اے۔ایس سال ملٹری ٹریننگ تے ایجوکیشن پروگراماں دے تحت 66پاک آرمی افسراں نے امریکا آنا سی۔
رائٹرز نے اپنی رپورٹ وچ ہور آکھیا کہ چالو ورھے ٹرمپ انتظامیہ نے پاکستان نال دفاعی تعاون نوں ختم کرن دی دھمکی وی دتی سی۔ رپورٹ وچ آکھیا گیا کہ امریکا نے پاکستان نوں یو ایس نیول وار، نیول سٹاف کالج، سائبر سکیورٹی دے پروگراماں توں وی فارغ کر دتا اے۔ دسیا گیا اے کہ امریکی وزیر دفاع جمیز میٹس نے ٹرمپ دے ایس فیصلے دی مخالفت کیتی سی۔امریکی حکام دا کہنا اے کہ پروگرام ختم کرن نال پاک امریکا تعلقات نوں نقصان اپڑ سکدا اے۔
ٹرمپ انتظامیہ دا ایہ فیصلا پاک امریکا تعاون تے بھروسے دی فضا نوں ختم کر سکدا اے۔ دوجے پاسے ترک صدر طیب اردوان نے آکھیا اے کہ لوکائی نوں ڈالر توں خوف کھان دی لوڑ نہیں، لوکائی ڈالر تے گولڈ نوں ترک کرنسی وچ بدل لین، ترک تے امریکا وچ سفارتی جھیڑے پاروں کرنسی وچ 19فیصد کمی ہوئی۔
