اسلام آباد( پاکستان پوائنٹ نیوز10۔اگست۔2018ء ) پاکستان تحریک انصاف دے چیئرمین عمران خان دی دوجی سابقہ بیوی ریحام خان عمران خان بارے کیتے جان والے اپنے مبینہ انکشافات تے بیاناں پاروں خبراں وچ رہندیاں نیں۔ ریحام خان نے کُجھ مہینے پہلاں ای اپنی کتاب ساہمنے لیاندی ۔ جیہدے وچ اوہناں نے عمران خان تے اوہناں دے قریبی ساتھیاں بارے انکشافات کیتے۔ جیہدے اُتے اوہناں نوں تنقید دا نشانہ وی بنایا گیا۔ ریحام خان نے عمران خان توں طلاق ہون مگروں کئی وار عمران خان دے بلیک بیری تے اوہدے وچ پئے میسجاں دا ذکر کیتا پر عمران خان دے فون بارے کوئی ثبوت پیش نہیں کیتا۔ پر ہن ریحام خان نے عمران خان دے بلیک بیری توں اک چیٹ(Chat)دی تصویر لے کے اوہنوں ٹویٹر اُتے شیئر کر دتا۔ مائیکرو بلاگنگ ویب سائٹ ٹویٹر اُتے اپنے پیغام وچ ریحام خان نے عمران خان دے مبینہ بلیک بیری دے مسیجاں دی تصویر شیئر کیتی تے لکھیا کہ ویکھو مینوں کیہ ملیا سی؟نال ای اوہناں نے ورتیندڑاں دا دھیان چیٹ وچ موجود اک نمبر ول دوایا تے آکھیا کہ ایس نمبر دا کالر آئی ڈی چیک کر لوو تہانوں ساریاں نوں پتا لگ جائے گا کہ 2015وچ کون بنی گالا میسج گھل رہیا سی۔
