اسلام آباد( پاکستان پوائنٹ نیوز08۔اگست۔2018ء ) پاکستان وچ گڈیاں دیاں قیمتاں گھٹ ہون دی آس،سپریم کورٹ نے ملک اندر تیار ہون والیاں گڈیاں اُتے لگے ٹیکس وچ کمی کرن دا حکم جاری کر دتا۔ تفصیل مطابق پاکستان وچ تیار تے ویچیاں جان والیاں گڈیاں اُتے لائے گئے ٹیکس خطے دے دوجے ملکاں دے مقابلے وچ بہت زیادہ نیں۔ پاکستان وچ تیار تے ویچیاں جان والیاں گڈیاں اُتے لائے گئے ٹیکس دی شرح 33فیصد دے نیڑے اے۔
آٹو کمپنیاں ولوں دسیا گیا اے کہ پاکستان وچ ویچیاں جان والیاں گڈیاں دی کل قیمت دا 33فیصد مختلف ٹیکساں اُتے مشتمل ہوندا اے۔ ایس حوالے نال اک شہری نے سپریم کورٹ وچ درخاست جمع کروائی اے ۔ درخاست وچ آکھیا گیا اے کہ ساریاں کمپنیاں دیاں گڈیاں اُتے لائے گئے ٹیکساں وچ کمی کیتی جائے۔ درخاست گزار نے گڈیاں اُتے لائے گئے ٹیکساں دی شرح نوں33فیصد توں گھٹ کر کے 15فیصد تیکر لیجان دی منگ کیتی۔
سپریم کورٹ نے درخاست اُتے غور کرن مگروں ایف بی آر تے وزارت خزانہ نوں حکم جاری کیتا اے۔ سپریم کورٹ ولوں جاری کیتے گئے حکم نامے وچ آکھیا گیا اے کہ گڈیاں اُتے لائے گئے ٹیکساں وچ چھیتی کمی کیتی جائے۔ سپریم کورٹ نے حکم دتا کہ گڈیاں اُتے لائے 33فیصد ٹیکس نوں گھٹ کر کے 25فیصد کیتا جائے۔ سپریم کورٹ دے حکم مگروں پاکستان وچ گڈیاں دیاں قیمتاں وچ واضح کمی ہون دی آس اے۔ ایس حوالے نال سپریم کورٹ دا کہنا اے کہ گڈیاں اُتے لائے ٹیکس دی موجودہ شرح ناجائز اے، ایس لئی ٹیکساں دی شرح وچ چھیتی کمی کرن لئی اقدامات کیتے جان۔
