اسلام آباد( پاکستان پوائنٹ نیوز08۔اگست۔2018ء ) وفاقی راجدھانی دے ایف نائن پارک وچ کُڑی نال اجتماعی زیادتی کرن وچ ملوث 5ملزماں نوں گرفتار کر لیا گیا اے۔ مارگلا پولیس نے ملزماں توں تفتیش شروع کر دتی،تفتیش دوران ملزماں نے کُڑی نال زیادتی دا اعتراف وی کیتا۔ تفصیل مطابق متاثرہ کُڑی ولوں درخاست دتی گئی کہ ایف نائن پارک ملازماں نے اوہنوں اک مُنڈے نال ویکھ کے غیر اخلاقی حرکتاں دا الزام لایا تے ڈران دی کوشش کیتی۔
سی ڈی اے ملازم نے دھمکی دتی کہ پارک وچ آن والے کُڑیاں مُنڈیاں نوں پولیس دے حوالے کیتا جاندا اے، جے ساڈی گل نہ منی تے پولیس دے حوالے کراں گے۔ کُڑی مطابق ملازماں نے 2ہزار رُپئے رشوت لے کے جنگل دے راہ باہر جان دا آکھیا جتھے پارک ملازم نے گارڈ تے ہور ملازماں ساہمنے ہوس دا نشانہ بنایا تے مارن دیاں دھمکیاں وی دتیاں۔وسیلیاں مطابق کُڑی دی درخاست اُتے پولیس نے دفعہ 376ت پ، دے تحت مقدمہ درج کر کے 5ملزماں نوں گرفتار کر لیا۔
دوجے پاسے تفتیش دوران ملزماں نے کُڑی نال اجتماعی زیادتی دا اعتراف وی کر لیا اے۔ وسیلیاں دا کہنا اے کہ گرفتار ملزماں وچوں 3 کیپٹل ڈویلمپنٹ اتھارٹی(سی ڈی اے) دے ملازم نیں، جیہناں دی شناخت مراد، شروز کیانی تے عبداللہ دے ناں توں ہوئی جدکہ باقی دو ملزم نجی کمپنی دے سکیورٹی گارڈ نیں۔چیتے رہوے کہ چیف جسٹس آف پاکستان جسٹس میاں ثاقب نثار نے وی ایف نائن پارک وچ کُڑی نال زیادتی دا آپ نوٹس لے لیااے۔
