لاہور( پاکستان پوائنٹ نیوز07۔اگست۔2018ء ) عوامی راج پارٹی دے سربراہ جمشید دستی نے لوکائی نوں مفت سفری سہولتاں دین والی بس سروس بند کر دتی اے۔ قومی اخبار دی اک رپورٹ مطابق جمشید دستی نے اپنے انتخابی حلقے این اے 102سنے قریبی علاقیاں وچ شہریاں نوں مفت سفری سہولتاں دی فراہمی لئی 2010مگروں مفت بس سروس شروع کیتی سی تے ایہناں بساں وچ سفر کرن والے شہریاں کولوں کرایہ نہیں لیا جاندا سی ۔
پر الیکشن2018وچ جمشید دستی نوں بہت بُرے طریقے نال ہار دا ساہمنا کرنا پیا۔ قومی اسمبلی دیاں تن تے اک صوبائی سیٹ ہار کے پارلیمانی سیاست توں باہر ہو جان والے جمشید دستی نے نہ صرف فری بس سروس بند کر دتی بلکہ بساں نوں مقامی پٹرول پمپ اُتے کھڑا کر دتا اے۔دوجے پاسے جمشید دستی دے میڈیا کوآرڈینیٹر سہیل غوری دا کہنا اے کہ فنڈز دی کمی پاروں فری بس سروس معطل کیتی گئی اے۔ کُجھ دناں مگروں سروس بحال کر دتی جائے گی۔
