پشاور( پاکستان پوائنٹ نیوز07۔اگست۔2018ء ) پاکستان تحریک انصاف دے چیئرمین عمران خان نے آکھیا اے کہ اسیں حکومت نہیں جہاد کرن آئے آں، صدر ، وزیر اعظم تے وزیراں دے خرچے گھٹ کرن لئی کمیٹی بناواں گے، آئی ایم ایف نال کیہ کرنا اے سوچ سمجھ کے اگانہ ودھنا اے، بیتے ویلے وچ جو لوک اقتدار وچ آئے اوہناں نے اپنی ذات لئی بہت کُجھ کیتا۔ اوہناں نے اج پشاور وچ تحریک انصاف دی پارلیمانی پارٹی نال خطاب کرد ے ہوئے آکھیا کہ حکومت وچ آکے اوکڑاں دا ساہمنا کرنا پئے گا۔
جو حالات ہن نیں اوہ پہلے کدی نہیں سن۔ خرچے گھٹ کرنے پین گے۔ صدر، وزیر اعظم تے وزیراں دے خرچے گھٹ کرنے پین گے۔ خرچے گھٹ کرن لئی کمیٹی بناواں گے۔ اوہناں نے آکھیا کہ اسیں حکومت یاں اقتدار دے مزے لُٹن لئی نہیں جہاد کرن آئے آں۔ اوہناں دا کہنا سی کہ بندہ کوشش کرے تے سبھ ٹھیک ہو سکدا اے۔ 5ورھیاں وچ ملک نوں ٹھیک کراں گے۔ عمران خان نے آکھیا کہ آئی ایم ایف نال کیہ کرنا اے سوچ سمجھ کے اگانہ ودھنا اے۔
پاکستان نوں معاشی طور اُتے بہت سارے مسئلیاں دا ساہمنا اے۔ اسیں ایس سلسلے وچ بہت سارا کم کرنا اے۔ اوہناں نے آکھیا کہ 50فیصد پاکستانی 2ویلے دی روٹی نہیں کھا سکدے۔ غیر ضروری خرچے ختم کر کے وسائل لوکائی اُتے خرچ کراں گے۔ عمران خان نے آکھیا کہ صوابدیدی فنڈ کسے کول نہیں ہوئے گا۔ اسیں قانون بناکے صوابدیدی فنڈز ختم کراں گے۔ اوہناں نے آکھیا کہ بیتے ویلے وچ جو لوک اقتدار وچ آئے اوہناں نے اپنی ذات لئی بہت کُجھ کیتا۔
شریف خاندان کیہ اوہناں دے بالاں نوں وی پروٹوکول ملدا اے۔ لاہور وچ شریف خاندان دا بچہ وی ہوئے تے ٹریفک روک دتی جاندی اے۔ چیئرمین پی ٹی آئی عمران خان نے آکھیاکہ مخصوص سیٹاں اُتے آن والے لوکاں نوں تیاری نال اسمبلی آنا چاہیدا۔ اوہناں نے آکھیا کہ سی پیک نوں ہر حال وچ کامیاب بناواں گے۔ عمران خان دا کہنا سی کہ پاکستان کسے بلیک میلنگ وچ نہیں آئے گا۔ اسیں پاکستان نوں فلاحی ریاست بنانا اے۔