لاہور( پاکستان پوائنٹ نیوز06۔اگست۔2018ء ) لاہور ہائیکورٹ نے رانا ثنااللہ دی کامیابی دا نوٹی فکیشن روکن دا حکم دے دتا، فیصل آباد توں مخالف امیدوار ڈاکٹر نثار جٹ نے درخاست دتی سی کہ رانا ثنااللہ نے نواز شریف دے استقبال نوں حج دے برابر قرار دے کے آرٹیکل63,62دی خلاف ورزی کیتی اے۔ میڈیا رپورٹس مطابق لاہور ہائی کورٹ نے فیصل آباد دے حلقہ این اے 106توں (ن) لیگی امیدوار رانا ثنااللہ دے مخالف امیدوار دی درخاست اُتے الیکشن کمیشن نوں نوٹس جاری کر دتا اے۔
لاہور ہائی کورٹ نے الیکشن کمیشن نوں این اے 106توں کامیاب ہون والے امیدوار رانا ثنااللہ دی کامیابی دا نوٹی فکیشن روکن دا حکم دے دتا اے۔ این اے 106فیصل آباد توں مخالف امیدوار ڈاکٹر نثار جٹ نے درخاست جمع کروائی سی۔درخاست گزار نے آکھیا سی کہ رانا ثنااللہ نے نواز شریف دے استقبال نوں حج دے برابر قرار دتا۔ رانا ثنااللہ نے آئین دے آرٹیکل 63,62دی خلاف ورزی کیتی۔
عدالت توں بینتی اے کہ رانا ثناء اللہ نوں نااہل قرار دے کے بطور ایم این اے کامیابی دا نوٹی فکیشن روکیا جائے۔ جیہدے اُتے لاہور ہائی کورٹ نے الیکشن کمیشن نوں رانا ثنااللہ دی کامیابی دا نوٹی فکیشن جاری کرن توں روک دتا اے۔دوجے پاسے چیئرمین تحریک انصاف عمران خان نے ہائی کورٹ دے فیصلے خلاف سپریم کورٹ وچ اپیل دائر کیتی اے۔درخاست وچ آکھیا گیا اے کہ ہائی کورٹ نے قانون خلاف دوبارہ گنتی دا فیصلا دتا، بینتی اے کہ لاہور ہائی کورٹ دا فیصلا کالعدم قرار دتا جائے۔
چیتے رہوے کہ لاہور ہائی کورٹ دے جج مامون رشید شیخ نے خواجا سعد رفیق دی درخاست اُتے سنوائی کردے ہوئے این اے 131وچ ووٹاں دی دوبارہ گنتی دا حکم دتا سی۔درخاست وچ خواجا سعد رفیق دا کہنا سی کہ ریٹرننگ افسر نے عمران خان نوں 603 ووٹاں توں کامیاب قرار دتا سی۔ ریٹرننگ افسر نوں دوبارہ گنتی دی درخاست دتی تے صرف رد ووٹاں دی گنتی کیتی گئی۔ پہلے سارے ووٹاں دی دوبارہ گنتی دی درخاست منظور کیتی گئی پر بعدوں اوہنوں رد کر دتا گیا۔درخاست وچ آکھیا گیا کہ این اے 131دے سارے ووٹاں دی دوبارہ گنتی دا حکم دتا جائے۔ جیہدے اُتے عدالت نے حلقے توں کامیاب امیدوار عمران خان ، الیکشن کمیشن سنے حلقہ این اے 131 دے ریٹرننگ افسر نوں نوٹس جاری کردے ہوئے دوبارہ گنتی دا حکم دتاسی۔
