لاہور( پاکستان پوائنٹ نیوز06۔اگست۔2018ء ) پاکستان تحریک انصاف دے سربراہ عمران خان دی سابقہ بیوی ریحام خان نے مولانا فضل الرحمان دی اک ویڈیو شیئر کیتی اے جیہدے وچ مولانا صاحب آکھ رہے نیں کہ عمران خان ورگے لوکاں دے اقتدار وچ ہوندے ہوئے ایہ ملک اسلامی ملک نہیں اکھوائے گا۔ میڈیا والے عمران خان نوں ودھا چڑھا کے پیش کردے نیں۔ میڈیا آکھدا اے کہ عمران خان دی صورت وچ پاکستان اُتے رب دی رحمت ہوئے گی۔ پر میرے خیال وچ تے ایہ ملک اُتے عذاب دی صورت وچ نازل ہوئے گا۔ مولانا فضل نے ہور آکھیاکہ میڈیا ولوں عمران خان ورگے نان کمٹڈ لوکاں نوں کس بنیاد اُتے اینی اہمیت دتی جا رہی اے ۔ میرے 35سال سیاست وچ لنگھ گئے نیں تے میں ایہ آکھ سکنا واں کہ جے بین الاقوامی اسٹیبلشمنٹ دا دبا ء نہ ہوندا تے میڈیا کدی عمران خان نوں سپورٹ نہ کردا۔ ریحام خان نے مولانا فضل الرحمان دی ویڈیو شیئر کردے ہوئے آکھیاکہ کاش مولانا صاحب ایہ گل ایس طرحاں کُھلم کُھلا پہلے بیان کر دیندے تے میں عمران خان نال کدی ویاہ نہ کردی۔ تے نہ ای اوہناں نوں ووٹ دیندی۔ اوہناں دا کہنا سی کہ جو لوک عمرا ن خان دی حقیقت نوں جاندے نیں اوہناں نوں کئی سال پہلے اوہناں دی اصلیت نوں بے نقاب کر دینا چاہیدا سی۔
چیتے رہوے کہ اسلام آباد ہائی کورٹ وچ چیئرمین پی ٹی آئی عمران خان نوں وزارت عظمی دا حلف لین توں روکن لئی درخاست جمع کروائی گئی اے۔ درخاست وچ آکھیا گیا اے کہ چیئرمین تحریک انصاف عمران خان آرٹیکل62تے 63دے تحت رکن قومی اسمبلی تے وزیر اعظم دے عہدے لئی اہل نہیں نیں۔ عمران خان نے الیکشن لڑن لئی اپنے کاغذات نامزدگی وچ اپنی دھی ٹیریان وائٹ دا ذکر نہیں کیتا اے۔ایس لئی عمران خان نوں وزیر اعظم بنن توں روکیا جائے۔ درخاست وچ الیکشن کمیشن، سپیکر قومی اسمبلی تے عمران خان دی سا بقہ بیوی ریحام خان نوں فریق بنایا گیا اے۔
