راولپنڈی( پاکستان پوائنٹ نیوز06۔اگست۔2018ء ) چیف آف آرمی سٹاف جنرل قمر جاوید باجوہ نے آکھیا اے کہ پاکستان دا مستقبل نوجوان نسل دے ہتھ وچ اے، جنگ دی نوعیت تے کردار بدل گئے نیں، ہائبرڈوار وچ نوجوان ہن ساڈے دشمناں دا وڈا نشانہ نیں، انتہا پسندی و دہشت گردی نوں جڑھوں پُٹن دا تہیہ کیتا اے۔ پاک فوج دے شعبہ تعلقات عامہ(آئی ایس پی آر) مطابق آرمی چیف جنرل قمر جاوید باجوہ نے آئی ایس پی آر وچ انٹرن شپ کرن والے پڑھیار تے پڑھیارناں نال خطاب کرد ے ہوئے اوہناں نوں مبارکباد دتی۔
آرمی چیف نے آکھیا کہ پاکستان وچ بہترین، ذہین تے متحرک نوجوان موجود نیں۔ پاکستانی نوجوان صلاحیت رکھدے نیں۔ پاکستان دا مستقبل نوجوان نسل دے ہتھ وچ اے۔ نوجوان ملک نوں امن و ترقی ول لیجا ن گے۔ آرمی چیف نے آکھیا کہ مینوں اپنی نوجوان نسل اُتے بھروسہ اے۔سانوں پورا بھروسہ اے کہ پاکستان دے نوجوان صلاحتاں نوں محسوس کر رہے نیں۔ نوجوان پاکستان نوں درست منزل ول لیجان۔
اوہناں نے آکھیا کہ جنگ دی نوعیت تے کردار بدل گئے نیں۔ ہائبرڈوار وچ نوجوان ہن ساڈے دشمناں دا وڈا نشانہ نیں۔ انتہا پسندی و دہشت گردی نوں جڑھوں پُٹن دا تہیہ کیتا اے۔جنرل قمر جاوید باجوہ نے آکھیاکہ فاٹا لمے عرصے توں دہشت گردی دا شکار رہیا اے۔ فاٹا نوں قومی دھارے وچ لیانا پائیدار امن تے استحکام لیان وچ مدد دیوے گا۔ دہشت گردی دے متاثرہ علاقیاں وچ استحکام آئے گا۔ اوہناں نے آکھیا کہ تعلیم ساڈی قومی ترجیح اے۔ بلوچستان وچ وی معیاری تعلیم لئی کوششاں جاری نیں۔ آرمی چیف دا کہنا سی کہ بلوچستان وچ نسٹ کیمپس بنایا جا رہیا اے۔
