اسلام آباد( پاکستان پوائنٹ نیوز04۔اگست۔2018ء ) پاکستان تحریک انصاف دے رہنما و ملک دے متوقع وزیر خزانہ اسد عمر نے امریکا دا مونہ بھن دتا۔ اسد عمر نے آکھیا کہ امریکا ساڈے بیل آؤٹ پیکج یاں آئی ایم ایف توں قرضے دی فکر چھڈ ے تے اپنے چینی قرضیاں دی فکر کرے۔ اوہناں دا کہنا سی کہ امریکا چین دا تقریبن 12سو ارب ڈالرز دا مقروض اے۔ اسد عمر نے آکھیا کہ پاکستانی معیشت نوں ویکھنا تے پیسیاں دا بندوبست کرنا ساڈا کم اے۔
امریکا ہن اوہدی فکر چھڈ دیوے۔ اوہناں نے ہور آکھیا کہ اسیں پاکستانی حکومت دے چین نال ہون والے سارے سمجھوتیاں نوں ساہمنے لیاواں گے۔ پاکستان نوں 12ارب ڈالر دی فوری ضرورت ہوئے گی تے پیسیاں دا بندوبست آؤندے 6مہینیاں وچ کرنا پئے گا۔ عالمی رسالے ’بلوم برگ‘ نوں دتے گئے انٹرویو وچ پاکستان تحریک انصاف دے رہنما اسد عمر نے آکھیا کہ نویں پاکستانی حکومت اک خطہ اک راہداری سڑک دے 60ارب ڈالر توں ودھ مالیت دے بنیادی ڈھانچے دے منصوبیاں وچ شفافیت لیائے گی۔
نویں انتظامیہ اپنے پہلے سو دناں اندر سنگاپور وانگ سرکاری سرپرستی وچ چلن والیاں کمپنیاں نوں ویلتھ فنڈ وچ بدلے گی تاں جے اوہناں وچ سیاسی مداخلت ختم کیتی جا سکے۔ پاکستان تحریک انصاف دے مرکزی رہنما نے آکھیا کہ نویں حکومت نے کارخانیاں تے زرعی شعبے نوں توانائی دین اُتے ٹیکس دی شرح گھٹ کرن د امنصوبہ بنایا اے تاں جے کاروباری شعبے دی خطے دے دوجے ملکاں نال مقابلے دی صلاحت ودھائی جا سکے۔
