اسلام آباد( پاکستان پوائنٹ نیوز04۔اگست۔2018ء ) اج دے دور وچ سوشل میڈیا ویب سائٹس دی اہمیت پہلے توں کیتے ودھ گئی اے۔ سوشل میڈیا ویب سائٹس وچوں ٹویٹر، فیس بک تے انسٹا گرام بہت مشہور نیں۔ وڈے وڈے سیاسی بندیاں،کھڈاریاں تے فنکاراں نے سماجی رابطیاں دی ویب سائٹس اُتے اپنے اپنے آفیشل اکاؤنٹس وی بنائے ہوئے نیں۔جتھوں اوہناں دے چاہیوان(مداح) اوہناں نوں فالو کردے تے روز دی اپ ڈیٹ لیندے نیں۔
ایسے طرحاں پاکستان تحریک انصاف دے چیئرمین عمران خان دا وی مائیکرو بلاگنگ ویب سائٹ ٹویٹر اُتے آفیشل اکاؤنٹ اے جیہدے فالورز دی گنتی 8.81ملین اے پر اینی وڈی فالوور شپ رکھن والے پاکستان دے آؤندے وزیر اعظم آپ صرف 19لوکاں نوں ای فالو کردے نیں۔ عمران خان نوں پسند کرن والے اوہناں دے حمایتی اوہناں 19لوکاں بارے جانن لئی اُتاولے نظر آؤندے نیں جیہناں نوں آپ کپتان نے فالو کیتا ہویا اے۔
پاکستان تحریک انصاف دے چیئرمین عمران خان نے مارچ 2010وچ اپنا ایہ ٹویٹر اکاؤنٹ بنایا سی۔ 8ورھے لنگھن تے 80لکھ فالورز ہون مگروں وی عمران خان نے صرف 19ٹویٹر اکاؤنٹس نوں ای فالو کیتا ہویا اے۔ جیہناں وچ اک اکاؤنٹ شوکت خانم ہسپتال، اک نمل یونیورسٹی، اک خیبرپختونخوا دی اپ ڈیٹس تے دو پاکستان تحریک انصاف دے آفیشل اکاؤنٹس نیں۔ایس توں وکھ پرچا کاراں وچ پاکستان تحریک انصاف دے چیئرمین عمران خان صرف حامد میر نوں فالو کردے نیں۔
عمران خان دی ایس لسٹ وچ تن سوانیاں وی شامل نیں۔ ایہناں تن سوانیاں وچ عمران خان دی سابقہ بیوی جمائمہ خان پاکستان تحریک انصاف دی رہنما شیریں مزاری تے عندلیب عباس شامل نیں۔ عمران خان جمائما دے بھرا بین گولڈ سمتھ نوں وی ٹویٹر اُتے فالو کردے نیں۔ ایس توں وکھ عمران خان دی لسٹ وچ جو بندے شامل نیں اوہناں نوں، خان صاحب دی کچن کیبنٹ دا ناں دتاجا سکدا اے۔
عمران خان دی ایس کیبنٹ وچ جہانگیر ترین، شاہ محمود قریشی، اسد عمر، نعیم الحق، عارف علوی، شفقت محمود، عمران اسماعیل، سیف اللہ خان نیازی تے علی حیدر زیدی شامل نیں۔ ایتھے جو گل غور کرن والی اے اوہ ایہ اے کہ پاکستان تحریک انصاف دے چیئرمین عمران خان نے کسے کھڈاری یاں سیاسی جماعت دے کسے وی رہنما نوں ٹویٹر اُتے فالو نہیں کیتا تے نہ ای کسے ملک دا سربراہ اوہناں دی فالوونگ لسٹ وچ شامل اے۔
